काठमाडौं । प्रधानमन्त्री पुष्पकमल दाहाल ‘प्रचण्ड’ले भारतीय उद्यमी/व्यवसायीलाई नेपालमा लगानी गर्न आग्रह गरेका छन् ।
भारतको औपचारिक भ्रमणमा रहेका प्रधानमन्त्री दाहालले सोमबार ‘फेडेरेसन अफ इन्डिया च्याम्बर्स अफ कमर्स एन्ड इन्डस्ट्री’ ९फिक्की) प्रतिनिधिमण्डलसँगको भेटवार्तामा यस्तो आग्रह गरेका हुन् ।
उनले नेपालको पर्यटन, कृषि, ऊर्जा लगायत क्षेत्रमा लगानीको प्रचुर सम्भावना रहेकोले ढुक्क भएर लगानी गर्न आग्रह गरे । उनले नेपाल सरकारले कानुनी संरचनालाई व्यापक सुधार गरेर लगानीका लागि उपयुक्त वातावरण सिर्जना गरेको बताए ।
‘लगानी सम्मेलनका क्रममा हामीले विभिन्न कानुनहरू अध्यादेशबाट संशोधन गरेका छौँ, त्यसले लगानीका क्षेत्रमा संरचनागत एवं संस्थागत सुधार भएको छ । ढुक्क भएर लगानी गर्न आग्रह गर्दछु,’ प्रधानमन्त्री दाहालले भने ।
भारत सरकारसँग १० वर्षमा १० हजार मेगावाट विद्युत् बिक्री गर्ने दीर्घकालीन सम्झौता भइसकेको अवस्थामा नेपालको ऊर्जा क्षेत्रमा लगानी गर्न उपयुक्त हुने उनले बताए ।
फिक्कीका अध्यक्ष अनिस शाहले नेपालको ऊर्जा, पर्यटन र सौर्य ऊर्जामा लगानी गर्न आफूहरू उत्साहित रहेको बताए ।
