काठमाडौं । लघुवित्त वित्तीय संस्थाहरूको खुद नाफामा सुधार आएको छ । चालु आर्थिक वर्ष २०८०/८१ को तेस्र्रो त्रैमासमा गत वर्षको सोही अवधिको तुलनामा लघुवित्तहरूको नाफा औसतमा २.८१ प्रतिशतले बढेको हो
हाल संचालनमा रहेका ५५ लघुवित्तमध्ये हालसम्म ५३ लघुवित्तले तेस्रो त्रैमासको अपरिष्कृत वित्तीय विवरण सार्वजनिक गरेका छन् । ५३ लघुवित्तले चालु आवको चैत मसान्तसम्म कुल ३ अर्ब ७५ करोड ८४ लाख रुपैयाँ खुद नाफा कमाएका छन् ।
यो गत वर्ष सोही अवधिको तुलनामा १० करोड २८ लाख रुपैयाँ धेरै हो । गत वर्ष चैतसम्म लघुवित्तले कुल ३ अर्ब ६५ करोड ५५ लाख रुपैयाँ खुद नाफा कमाएका थिए ।
समीक्षा अवधिमा लघुवित्तहरूको खुद ब्याज आम्दानीमा झिनो वृद्धि भए पनि कर्जा पुनर्तालिकीकरण तथा पुनर्संरचनाको सुविधाका कारण नाफामा वृद्धि भएको हो ।
राष्ट्र बैंकले चैत मसान्तसम्म तिर्न बाँकी ब्याजको न्यूनतम ५ प्रतिशत ब्याज रकम तिरेर ऋणको पुनर्तालिकीकरण र पुनर्संरचना गर्न पाउने सुविधा दिएको थियो । सोही अनुसार कर्जा पुनर्तालिकीकरण र पुनर्संरचना गरेकाले खराब कर्जा घट्न जाँदा नाफामा सुधार आएको हो । कर्जा पुनर्संरचना गर्दा लघुवित्तहरूको प्रोभिजन रकम घटेकाले नाफामा सकारात्मक प्रभाव परेको हो ।
साथै, पछिल्लो समय लघुवित्तहरूको कर्जा रिकभरीमा सुधार आउँदा र बैंकको ब्याजदर घट्दा समेत नाफा बढ्न सहयोग पुगेको हो ।
समीक्षा अवधिमा ५३ मध्ये ३३ लघुवित्तको नाफा बढेको छ भने २० वटाको घटेको छ । यस्तै, यही अवधिमा ३० लघुवित्तले खराब कर्जा घटाएका छन् ।
समीक्षा अवधिमा छिमेक लघुवित्तले सर्वाधिक ६४ करोड ३७ लाख रुपैयाँ खुद नाफा कमाएको छ । त्यस्तै, साना किसानले ५३ करोड ४५ लाख रुपैयाँ नाफा कमाएको छ । यस अवधिमा १० लघुवित्तले मात्र १० करोड रुपैयाँ बढी नाफा कमाएका छन् ।
१४ लघुवित्तले दोब्बरभन्दा धेरैले बढाए नाफा
समीक्षा अवधिमा ३३ लघुवित्तको नाफा बढेको छ । तीमध्ये १४ लघुवित्तको नाफा दोब्बरभन्दा धेरैले बढेको छ ।
समीक्षा अवधिमा विजय लघुवित्तले सबैभन्दा धेरै झण्डै १९ गुणाले नाफा बढाएको छ । गत चैतमा १७ लाख ६१ हजार रुपैयाँ नाफा कमाएको विजयको नाफा चालु वर्षमा १७८३.३६ प्रतिशतले बढेर ३ करोड ३१ लाख रुपैयाँ पुगेको छ ।
त्यस्तै, समीक्षा अवधिमा मेरो माइक्रोफाइनान्सको ८४६.३० प्रतिशत, उपकार लघुवित्तको ३७८.२४ प्रशित, समता घरेलुको ३२१.४४ प्रतिशत, श्रृजनशीलको ३२०.२१ प्रतिशत, निर्धन उत्थानको २९९.४६ प्रतिशतले नाफा बढेको छ ।
त्यसैगरी, इन्फिनिटीको २८०.५७ प्रतिशत, सीवाइसी नेपालको २६३.४० प्रतिशत, किसान लघुवित्तको २५१.५९ प्रतिशत, नेरुडे मिर्मिरे २०१.७६ प्रतिशत, फरवार्डको १६७.१७ प्रतिशत, जनउत्थानको १६३.१२ प्रतिशत र महुली लघुवित्तको १३८.१४ प्रतिशतले नाफा बढेको छ ।
८ लघुवित्त घाटामा
समीक्षा अवधिमा ८ लघुवित्त कम्पनी भने घाटामा संचालनमा छ । गत वर्ष यही अवधिमा १२ लघुवित्त संस्थाहरू नोक्सानीमा थिए ।
चालु आवमा एनएमबी लघुवित्त सबैभन्दा धेरै ७ करोड ४९ लाख रुपैयाँ घाटामा छ । त्यसैगरी, धौलागिरि लघुवित्त ४ करोड ९३ लाख, सामुदायिक ४ करोड ५९ लाख, अभियान २ करोड २३ लाख, मनकामना स्मार्ट १ करोड १० लाख रुपैयाँ नोक्सानीम छन् ।
त्यस्तै, मानुषि लघुवित्त ७२ लाख, विन नेपाल ४७ लाख र समाज लघुवित्त २३ लाख रुपैयाँ घाटामा छन् ।
