काठमाडौं । सोल्टी होटल लिमिटेडको खुद नाफामा सामान्य सुधार आएको छ । कम्पनीले शुक्रबार सार्वजनिक गरेको चालु आव २०८०/८१ को तेस्रो त्रैमासको अपरिष्कृत वित्तीय विवरण अनुसार खुद नाफा ११.०८ प्रतिशतले बढेको छ ।
चालु आवको चैत मसान्तसम्म कम्पनीले ४१ करोड २३ लाख रुपैयाँ खुद नाफा कमाएको छ । यो अघिल्लो वर्षको तुलनामा ४ करोड १२ लाख रुपैयाँ धेरै हो । गत वर्ष सोही अवधिमा सोल्टीले ३७ करोड ११ लाख रुपैयाँ नाफा कमाएको थियो ।
पछिल्लो समय पर्यटकीय गतिविधिमा सुधार आएसँगै कम्पनीको आम्दानी बढ्दा नाफा बढेको हो ।
समीक्षा अवधिमा कम्पनीको कुल आम्दानी ११.३८ प्रतिशतले बढेर १ अर्ब ६८ करोड रुपैयाँ पुगेको छ । सेवा सुविधा र ब्राण्डका कारण सोल्टी पर्यटकको रोजाइमा पर्ने गरेको छ ।
नेपाल भ्रमणमा आउने अधिकांश विदेशी राष्ट्रका प्रमुखदेखि अन्य उच्च ओहोदाका व्यक्तिहरु सोल्टीमै बस्ने गरेका छन् । सोल्टी होटलमा सरकारी तथा निजी क्षेत्रका कार्यक्रमहरु आयोजना गर्ने क्रम पनि बढ्दो छ । जसकारण होटलको आम्दानी बढेको हो ।
यस्तै, कम्पनीको संचालन नाफा ११.३८ प्रतिशतले बढेर ५१ करोड १२ लाख रुपैयाँ पुगेको छ ।
हाल ९२ करोड ८२ लाख रुपैयाँ चुक्ता पूँजी रहेको कम्पनीको रिटेन्ड अर्निङ तथा जगेडा कोषमा १ अर्ब ३५ करोड रुपैयाँ संचित छ ।
समीक्षा अवधिमा सोल्टीको प्रतिसेयर आम्दानी २४ पैसा बढेर ४.४४ रुपैयाँ पुगेको छ । यस अवधिमा कम्पनीको प्रतिसेयर नेटवर्थ २४.५८ रुपैयाँ छ ।
