काठमाडौं । सेयर बजारमा करेक्शन आएको छ । यससाता अघिल्ला ३ दिनमा ४० अंकले बढेको नेप्सेमा आज ७ अंकले घटेको हो ।
बिहीबार नेप्से परिसूचक ७.३१ अंकले घटेर १९९८.९६ विन्दुमा आइपुगेको छ । सूचकसँगै कारोबार रकममा पनि गिरावट आएको छ । अघिल्लो दिनको तुलनामा कारोबार रकम ६३ करोडले घटेर ४ अर्ब १३ करोड रुपैयाँ पुगेको छ ।
यसदिन ३०८ कम्पनीका ९४ लाख ९८ हजार २९८ कित्ता सेयर किनबेच भएको छ । कारोबारमा आएका १३ वटा समूहमध्ये माइक्रोफाइनान्स र व्यायार बाहेक अरु सबैको परिसूचक घटेको छ ।
आज माइक्रोफाइनान्सको सेयरमा लगानीकर्ताको आकर्षण देखिएको छ । यस समूहको परिसूचक सर्वाधिक ३.४५ प्रतिशतले बढेको छ ।
गत वर्षको नाफाबाट ३४.५ प्रतिशत लाभांश घोषणा गरेको आइएमई लाइफ इन्स्योरेन्सको सर्वाधिक कारोबार भएको छ । यसको २८ करोड ७७ लाख रुपैयाँ बढीको ४ लाख ९७ हजार ५७ कित्ता सेयर किनबेच भएको छ ।
आज ६१ कम्पनीको सेयर मूल्य बढेको छ भने १६१ कम्पनीको घटेको छ । घट्दो बजारमा पनि आज ३ कम्पनीको सेयर मूल्यमा पोजेटिभ सर्किट लागेको छ । समता घरेलु, इन्फिनिटी र साधना लघुवित्तको सेयर मूल्य ठ्याक्कै १० प्रतिशतले बढेको छ ।
पिपुल्स पावरका सेयरधनीले भने सर्वाधिक ८.२१ प्रतिशत गुमाएका छन् ।
