काठमाडौं । विकास बैंकहरूको खुद नाफामा झिनो गिरावट आएको छ । विकास बैंकहरूले सार्वजनिक गरेको चालु आव २०८०/८१ को तेस्रो त्रैमासको अपरिष्कृत वित्तीय विवरण अनुसार खुद नाफा औसतमा ०.८४ प्रतिशतले घटेको हो ।
चालु आवको चैतसम्म १६ विकास बैंकले कुल ३ अर्ब ४७ करोड ७७ लाख रुपैयाँ खुद नाफा कमाएका छन् । यो गत वर्ष सोही अवधिको तुलनामा २ अर्ब ९४ करोड रुपैयाँ कम हो । गत वर्ष चैतसम्म ३ अर्ब ५० करोड ७१ लाख रुपैयाँ खुद नाफा कमाएका थिए ।
तेस्रो त्रैमासमा वाणिज्य बैंक र फाइनान्स कम्पनीहरूको तुलनामा विकास बैंककहरूको नाफा थोरै घटेको छ । वाणिज्य बैंक्को नाफा १३.४७ प्रतिशतले घटेको छ भने फाइनान्स कम्पनी समग्रमा नोक्सानी मै रहेका छन् । तर, विकास बैंकको नाफा भने १ प्रतिशतभन्दा कमले मात्र घटेको हो ।
समीक्षा अवधिमा १६ विकास बैंकमध्ये ६ वटा बैंकको मात्रै नाफा बढेको छ भने अरुको घटेको छ । यस अवधिमा ४ वटा बैंक नोक्सानीमा गएका छन् ।
अर्थतन्त्रमा आएको मन्दीको असर बैंक तथा वित्तीय संस्थाहरूको नाफामा देखिएको हो । अर्थतन्त्र शिथिल हुँदा बैंकहरूले नयाँ व्यवसाय विस्तार गर्न नसक्दा र विगतमा गरिएको कर्जा असुली नहुँदा नाफामा असर परेको हो ।
आर्थिक मन्दीका कारण उद्योग व्यवसाय चौपट हुँदा ऋणीको ऋण तिर्ने क्षमतामा ह्रास आएको छ । जसकारण बैंकहरूको कर्जा असुली हुन नसक्दा खराब कर्जा समेत बढेको छ । एकातिर कर्जाको माग नहुँदा नयाँ कर्जा विस्तार नहुनु र अर्कोतर्फ विगतमा लगानी गरिएको ऋण असुली नहुँदा खराब कर्जा बढी प्रोभिजनिङ बढ्दा बैंकहरूको नाफा घटेको हो ।
सर्वाधिक कमाउने मुक्तिनाथ, ४ वटा घाटामा
समीक्षा अवधिमा विकास बैंकहरूमा मुक्तिनाथले सबैभन्दा धेरै ८७ करोड १८ लाख रुपैयाँ नाफा कमाएको छ । मुत्तिःनाथले गत वर्षको तुलनामा यस वर्ष खुद नाफा ८.१२ प्रतिशतले बढाएको हो ।
त्यस्तै, गरिमा विकासले दोस्रो धेरै ६८ करोड ३५ लाख नाफा कमाएको छ । गत वर्षको तुलनामा यसले पनि नाफा ४.८५ प्रतिशतले बढाएको छ ।
त्यसैगरी, चैतसम्म साइन रेसुंगाले ५१ करोड ४७ लाख, महालक्ष्मी ३७ करोड ३६ लाख, लुम्बिनी विकास ३४ करोड २२ लाख सांग्रिला डेभलपमेन्ट २६ करोड २९ लाख रुपैयाँ खुद नाफा कमाएका छन् ।
समीक्षा अवधिमा ४ वटा विकास बैंक भने घाटामा रहेका छन् । जसमा सप्तकोशी विकास बैंक सबैभन्दा धेरै ७ करोड ३१ लाख रुपैयाँ नोक्सानीमा छ । त्यस्तै, सिन्धु विकास ५ करोड ४१ लाख, एक्सेल डेभलपमेन्ट ५ करोड ३७ लाख र नारायणी विकास बैंक ४३ लाख घाटामा छन् ।
