काठमाडौं । विश्व बजारमा आगामी दिनमा कच्चा तेलको भाउ झनै बढ्ने अनुमान गरिएको छ ।
अमेरिकी बहुराष्ट्रिय लगानी बैंक जेपी मोर्गन एन्ड चेजले आगामी अगष्ट-सेप्टेम्बरसम्म कच्चा तेलको भाउ प्रतिब्यारेल १०० डलरसम्म पुग्न सक्ने प्रक्षेपण गरेको हो ।
इरान र इजरायल बीच युद्धको सम्भावना, मेक्सिकोले तेल निर्यात घटाउँदै लैजानु, तेल उत्पादकदेशहरुले उत्पादनमा कटौती गर्नु लगायत कारणले कच्चा तेलको मूल्य आकाशिने उसको अनुमान छ ।
मागको तुलनामा आपूर्ति कम हुँदा अहिले कच्चा तेलको मूल्य ६ महिना यताकै महँगो भएको छ । गत सेम्टेम्बरमा प्रतिब्यारेल ७० हाराहारी रहेकोमा अहिले बढेर ९० डलर पुगिसकेको छ ।
कच्चा तेलको भाउमा हुने वृद्धिले विश्वभर महँगी बढ्ने चिन्ता पनि बढाएको छ । महँगी बढ्यो भने केन्द्रीय बैंकहरूको ब्याजदर कटौती योजनालाई असर गर्न सक्नेछ । विश्वव्यापी रूपमा कच्चा तेलको माग बढे पनि आपूर्ति कम छ ।
मेक्सिकोबाट तेल निर्यात गत महिना ३५ प्रतिशतले घटेर सन् २०१९ यताकै न्यून स्तरमा झरेको छ । मार्चमा मेक्सिको, अमेरिका, कतार र इराकले आफ्नो संयुक्त तेल उत्पादन प्रति दिन १० लाख ब्यारेलले घटाएका थिए ।
यस्तै, अमेरिकी प्रतिबन्धका कारण रुसी सामान समुद्रमा फसेको छ । अर्को लक्ष्य भेनेजुएलाको आपूर्तिमा अवरोध गर्नु रहेको छ । लाल सागरमा हुथी विद्रोहीहरूले सामान ढुवानी गर्ने ट्याङ्करहरूमाथि आक्रमण गरेपछि कच्चा तेलको निर्यात ढुवानी ढिलाइ भएको छ । यसले पनि भाउ बढाउने जेपी मोर्गनको अनुमान छ ।
