काठमाडौं । पछिल्लो १ वर्षमा विश्वभर १४१ डलर अर्बपति थपिएका छन् । विश्व प्रसिद्ध फोर्ब्स म्यागजिनले सार्वजनिक गरेको डलर अर्बपतिहरूको नयाँ सूची अनुसार यस वर्ष १४१ जना अर्बपति थपिएका हुन् ।
गत वर्ष विश्वभर डलर अर्बपतिको संख्या २ हजार ६४० जना रहेकोमा यस वर्ष बढेर २ हजार ७८१ जना पुगेको फोर्ब्सले जनाएको छ ।
फोर्ब्सले यो वर्षको मार्चदेखि स्टक मूल्य र विनिमय दरहरूको आधारमा विश्वका डलर अर्बपतिहरूको नयाँ सूची सार्वजनिक गरेको हो।
फोब्र्सको सूची अनुसार लुई भिटनका मालिक बर्नार्ड अर्नाल्ड विश्वकै सबैभन्दा धनी व्यक्ति बनेका छन् । फ्रेन्च अर्बपति बर्नार्डको २२३ बिलियन डलर रहेकको फोर्ब्सले उल्लेख गरेको छ ।
त्यस्तै, टेस्ला तथा स्पेस एक्सका मालिक एलन मस्क सूचीको दोस्रो नम्बरमा छन्। उनको सम्पत्ती १९५ बिलियन अमेरिकी डलर रहेको छ ।
अमेजनाका मालिक जेफ बेजोस १९४ डलरसहित विश्वका तेस्रो धनी व्यक्ति बनेका छन् । चौथो स्थानमा फेसबुकमा मालिक मार्क जुकरबर्ग छन्। उनको सम्पत्ति १७७ बिलियन डलर रहेको छ ।
यस्तै, भारतका मुकेश अम्बानी नवौं नम्बरमा छन्। उनको सम्पत्ति ११६ बिलियन रहेको फोब्र्सले उल्लेख गरेको छ । भारतकै अर्का धनाढ्य गौतम अडानी ८४ बिलियन डलरसहित १७ औं स्थानमा छन् ।
नेपालको एकमात्रै डलर अर्बपति विनोद चौधरी सूचीको १ हजार ७६४ औं नम्बरमा छन्। उनको सम्पत्ति १.८ बिलियन डलर रहेको उल्लेख छ।
सबैभन्दा धेरै अर्बपति अमेरिकामा
एक वर्षमै अर्बपतिहरुको सम्पत्ति २ ट्रिलियन डलरले बढेको छ । यस वर्ष डलर अर्बपतिहरूको कुल सम्पत्ति १४.२ ट्रिलियन डलर पुगेको छ। गत वर्ष विश्वका अर्बपतिहरुको कुल सम्पत्ति १२.२ २ ट्रिलियन डलर थियो ।
विश्वमा सबैभन्दा धेरै डलर अर्बपति अमेरिका रहेका छन् । अमेरिकामा मात्रै ८१३ जना डलर अर्बपति छन् । यो विश्वका कुल अर्बपतिहरुको संख्याको २९.२३ प्रतिशत हो ।
त्यसैगरी, चीन विश्वमा दोस्रो धेरै अर्बपति हुने देश बनेको छ चीनका ४७३ व्यक्ति अर्बपति रहेका छन् ।
दक्षिण एसियाली देश भारतका २०० जना अर्बपति रहेका छन् ।
