काठमाडौं । जीवन बीमा कम्पनीहरूले चालु आर्थिक वर्ष २०८०/८१ को ८ महिना (साउन-फागुन)मा झन्डै १ खर्ब रुपैयाँ बराबरको व्यवसाय गरेका छन् ।
नेपाल बीमा प्राधिकरणको तथ्यांक अनुसार जीवन बीमा कम्पनीहरू (१४ जीवन बीमा र ३ लघु जीवन बीमा)ले चालु आर्थिक वर्षको फागुन मसान्तसम्म कुल ९८ अर्ब ५९ करोड रुपैयाँ बीमा शुल्क संकलन गरेका छन् । यो गत वर्षको सोही अवधिको तुलनामा ५.१९ प्रतिशत अर्थात् ४ अर्ब ८७ करोड रुपैयाँ धेरै हो । गत वर्ष सोही अवधिमा कम्पनीहरूले ९३ अर्ब ७२ करोड रुपैयाँ बराबर प्रिमियम संकलन गरेका थिए ।
यस अवधिमा १४ जीवन बीमा कम्पनीले ९८ अर्ब ५३ करोड र ३ लघुबीमा कम्पनीले ५ करोड ८९ लाख रुपैयाँ प्रिमियम संकलन गरेका छन् ।
पछिल्ला महिनाहरूमा अर्थतन्त्र क्रमशः चलायमान हुँदै जाँदा बीमा कम्पनीहरूको व्यवसाय पनि बढ्न थालेको हो । चालु वर्षको माघसम्म प्रथम बीमा शुल्क संकलन घटे पनि फागुनमा भने केही सुधार देखिएको छ । अघिल्ला महनिाहरूमा प्रथम बीमाशुल्क संकलन गत वर्षको तुलनामा घटे पनि फागुनमा भने बढेको छ ।
प्राधिकरणका अनुसार चालु आवको फागुनसम्म बीमा कम्पनीले १८ अर्ब ७२ करोड रुपैयाँ बराबरको नयाँ पोलिसी जारी गरेका छन् । गत वर्षको तुलनामा ३५ करोडले नयाँ व्यवसाय बढाएका हुन् ।
बीमा कम्पनीको समग्र व्यवसाय भने पुरानै पोलिसीले धानेको देखिन्छ । कुल बीमा शुल्कको ८१ प्रतिशत रकम बीमालेख नवीकरणाबाट उठाएका छन्। फागुनसम्म ७९ अर्ब ८६ करोड रुपैयाँ नवीकरण शुल्क आर्जन गरेका छन् । यो गत वर्षको सोही अवधिको तुलनामा ४ अर्ब ६६ करोड रुपैयाँ हो । गत वर्ष फागुनसम्म नवीकरण बापत ७५ अर्ब २० करोड रुपैयाँ संकmलन गरेका थिए ।
समीक्षा अवधिमा प्रिमियम संकलन बढे पनि सक्रिय बीमालेखको संख्या भने घटेको छ । गत वर्षको तुलनामा सक्रिय बीमा लेखको संख्या १ लाख ९४ हजार ३२७ वटाले घटेको छ । गत वर्षको फागुनसम्म सक्रिय रहेको कुल बीमा लेखको संख्या १ करोड ४० लाख १ हजार ५७६ रहेकोमा यस वर्षको सोही अवधिसम्म आइपुग्दा घटेर १ करोड ३८ लाख ७ हजार २४९ रहेको छ । जबकि यस वर्ष तीनवटा लघु जीवन बीमा कम्पनीहरूको पनि व्यवसाय थपिएको छ ।
नेपाल लाइफको वर्चश्व कायमै
समीक्षा अवधिमा बीमा शुल्क संकलनमा नेपाल लाइफको वर्चश्व कायमै रहेको छ । कुल बीमा शुल्क मध्ये नेपाल लाइफ एक्लैले एकचौथाई बढी बीमा शुल्क संकलन गरेको छ । यस अवधिमा नेपाल लाइफले मात्रै २६ अर्ब ३० करोड रुपैयाँ संकलन गरेको छ । यो कुल व्यवसायको २६.६७ प्रतिशत हिस्सा हो ।
यसैगरी , यस अवधिमा लाइफ इन्स्योरेन्स कर्पोरेसन (नेपाल), नेशनल लाइफ र लाइफ इन्स्योरेन्स कर्पोरेशनले समान १० अर्ब बढी रुपैयाँ प्रिमियम संकलन गरेको छ । फागुनसम्म नेशनलले ११ अर्ब ५६ करोड, हिमालयन ११ अर्ब १८ करोड र लाइफ इन्स्योरेन्स कर्पोरेशनले ११ अर्ब ५७ करोड रुपैयाँ बीमा शुल्क संकलन गरेका छन् ।
यस्तै, राष्ट्रिय बीमा कम्पनीले ५ अर्ब २३ करोड, एशियन लाइफले ५ अर्ब १८ करोड, सूर्यज्योतिले ५ अर्ब ७० करोड, मेट लाइफले ३ अर्ब ६३ करोड, आइएमई लाइफ २ अर्ब ८२ करोड, सन नेपाल लाइफ २ अर्ब ४२ करोड, रिलायन्स लाइफ २ अर्ब ६३ करोड, सिटिजन लाइफ ३ अर्ब ७२ करोड, सानिमा रिलायन्स ३ अर्ब ८० करोड र प्रभु महालक्ष्मीले २ अर्ब ७१ करोड रुपैयाँ बीमा शुल्क आर्जन गरेको छ ।
लघुबीमाको हिस्सा नगन्य
समीक्षा अवधिमा लघु जीवन बीमा कम्पनीको व्यवसाय भने न्यून रहेको छ । गत वर्षदेखि संचालनमा आएका ३ लघुबीमा कम्पनीले चालु आवको ८ महिनामा जम्मा ५ करोड ८९ लाख रुपैयाँ मात्रै बीमा शुल्क संकलन गरेका छन् ।
जसमा गार्डियन माइक्रो लाइफले १ करोड ५९ लाख, क्रेष्ट माइक्रो लाइफले ३ करोड ६१ लाख र लिबर्टी माइक्रो लाइफले ६९ लाख ३७ हजार रुपैयाँ प्रिमियम संकलन गरेका छन् ।
