काठमाडौं । सत्ता गठबन्धले आफ्नो न्यूनतम् साझा कार्यक्रम सार्वजनिक गरेको छ । मंगलबार सिंहदरबारमा आयोजित एक कार्यक्रममा बीच सत्ता गठबन्धनका पाँच राजनीतिक दलले साझा संकल्प सार्वजनिक गरेका हुन् ।
वर्तमान सरकारमा सहभागी हामी नेपाल कम्युनिष्ट पार्टी (एमाले), नेपाल कम्युनिष्ट पार्टी (माओवादी केन्द्र), राष्ट्रिय स्वतन्त्र पार्टी, जनता समाजवादी पार्टी, नेपाल र नेपाल कम्युनिस्ट पार्टी (एकीकृत समाजवादी)ले सरकारको न्यूनतम नीतिगत प्राथमिकता र साझा संकल्प प्रस्तुत गरेका हुन् ।
गठबन्धनले विद्यमान आर्थिक शिथिलता अन्त्य गर्नुलाई आफ्नो पहिलो प्राथमिकतामा राखेकाे छ। । अर्थतन्त्रमा उत्पादनदेखि उपभोगसम्म र लगानीदेखि व्यापारसम्म देखिएको शिथिलता हटाउन नीतिगत सुधार गर्दै आर्थिक क्रियाकलापलाई तीव्रता दिने उनीहरूकाे संकल्प छ ।
सुस्त कर्जा प्रवाह र पूँजीगत सार्वजनिक खर्चको न्यूनताजस्ता समस्याको समाधान गर्ने, वित्तीय र मौद्रिक नीतिबीच समन्वय गर्दै, तात्कालिक र मध्यकालीन लगानी र रोजगार–मैत्री नीतिगत सुधारमा बाधा पुर्याउने विभिन्न कानुनहरू संशोधन गर्ने नीति राखेका छन् ।
यस्तै, सेयर बजारलाई नीतिगत सुधारमार्फत् चलायमान बनाउने, सार्वजनिक वित्तको दिगो व्यवस्थापनमा चुनौतीको रूपमा रहेको राजश्व र खर्च बीच बढिरहेको अन्तरलाई कम गर्न राजश्व सुधार, सरकारी खर्चमा मितव्ययिता, वैदेशिक सहयोगका नवीन स्रोतहरूको पहिचान र परिचालन गर्ने संकल्प गरेका छन् ।
यसैगरी, कुनै पनि कालखण्डमा भएको भ्रष्टाचार र जो कोही भ्रष्टाचारीमाथि छानबिन गर्ने उल्लेख छ । अख्तियार दुरुपयोग अनुसन्धान आयोगजस्ता नियामक निकायलाई कानुन, जनशक्ति, स्रोत र साधनबाट अधिकारसम्पन्न बनाई भ्रष्टाचार निवारण र सदाचारको प्रत्याभूति गर्ने पाँच दलको संकल्प छ ।
‘भ्रष्टाचार र अख्तियारको दुरुपयोगसँग जोडिएको विषयसँग सम्बन्धित विषयको छानबिन र अनुसन्धान गरी कुनै पनि कालखण्डमा भएका भ्रष्टाचार र जोकोही भ्रष्टाचारी माथि कानुनी कारबाही गरी भ्रष्टाचारी एक दिन कारबाहीको कठघरामा पुग्नेछ भन्ने विश्वास नेपाली समाजमा स्थापित गर्ने,’ साझा संकल्पमा भनिएको छ ।
