काठमाडौं । काठमाडौंको डिल्लीबजारस्थित प्लाटिनम कलेजका संचालक जीवन गुरुङ विरुद्ध मुद्दा दर्ता भएको छ ।
पूर्वउपराष्ट्रपति नन्द बहादुर पुनका सल्लाहकार समेत रहेका गुरूङ १४ किलो सुन तस्करी प्रकरणमा संलग्न भएको भन्दै शुक्रबार त्रिभुवन अन्तर्राष्ट्रिय विमानस्थल भन्सार कार्यालयले काठमाडौं जिल्ल अदालतमा मुद्दा दायर गरेको हो ।
उनीविरुद्ध १ अर्ब ४० करोड ५५ लाख रुपैयाँ बिगो दाबी गरिएको छ । साथै, ५ वर्ष कैद सजाय समेत माग गरिएको छ ।
गुरुङकै संलग्नतामा गत मंसिर २१ गते यूएईको दुबइबाट अवैध रुपमा ल्याइएको १४ किलो सुन त्रिभुवन अन्तर्राष्ट्रिय विमानस्थलबाट बरामद गरिएको थियो । साेही प्रकरणामा मीन घले विमानस्थलमै पक्राउ परेका थिए ।
घले र गुरुङ बीच सुन तस्करीका बारेमा पटक पटक कुरा भएको प्रमाण भेटिएपछि मुद्दा दर्ता गरिएको भन्सार कार्यालयले जनाएको छ ।
घले पक्राउ परे पनि गुरुङ फरार रहेका थिए । उनलाई गुरुङलाई नेपाल प्रहरीको केन्द्रीय अनुसन्धान ब्यूरो (सीआइबी)ले फागुन १४ गते पक्राउ गरेको थियो ।
यसअघि सोही प्रकरणमा पुस १७ गते १० जना विरुद्ध मुद्दा दर्ता भएको थियो । उनीहरु विरुद्ध १ अर्ब ४० करोड रुपैयाँ बिगो दाबी गरिएको छ ।
