काठमाडौं । सेयर बजारमा दोस्रो सर्किट ब्रेक लागेको छ । मंगलबार बजार खुलेको ३ मिनेटमै नेप्से ४ प्रतिशतले बढेर पहिलो सर्किट लाग्दै २० मिनेटका लागि कारोबार स्थगित भएको थियो ।
त्यसपछि खुलेको नेप्से २० सेकेण्डैमै ५ प्रतिशतले बढेपछि दोस्रो सर्किट ब्रेक लागेर ४० मिनेटका लागि कारोबार स्थगित भएको हो ।
आज ११ः२४ बजेसम्म नेप्से ९८.६९ अंकले बढेर २०५९ बिन्दुमा पुगेको छ । परिसूचकमा उछाल आए पनि जम्मा २६ करोड ३७ लाख रुपैयाँको मात्र सेयर कारोबार भएको छ ।
पुरानो नेपाली काँग्रेससँगको सत्ता गठबन्धन भत्काएर माओवादीले नेकपा एमाले, राष्ट्रिय स्वतन्त्र पार्टी सहितको नयाँ गठबन्धन सरकार बनाउने भएसँगै नेप्सेमा उछाल आएको हो ।
सत्ता समीकरण फेरिएसँगै नयाँ अर्थमन्त्री आउने छन् । विगतमा सेयर बजारमैत्री भनेर चिनिएका पूर्वअर्थमन्त्री फेरि विष्णुप्रसाद पौडेल फेरि अर्थमन्त्री बन्ने हल्लाका कारण लगानीकर्ता उत्साहित हुँदा नेप्सेले छलाङ हानेको हो ।
नेप्सेको नियम अनुसार कारोबार खुलेको पहिलो १ घण्टाभित्र (११ देखि १२ बजेसम्म) नेप्से परिसूचक ४ प्रतिशतले घट्यो वा बढ्यो भने भने सर्किट लगाई २० मिनेटका लागि कारोबार स्थगन हुन्छ । त्यसैगरी कारोबार सुरु भएको दोस्रो घण्टाभित्र (१२ देखि १ बजेसम्म) नेप्से परिसूचक ५ प्रतिशतले घट्यो वा बढ्यो भने पुनः सर्किट लगाई ४० मिनेटका लागि कारोबार रोकिन्छ ।
त्यस्तै दोस्रो सर्किटपछि पनि सूचक ६ प्रतिशतले घट्यो वा बढ्यो भने सर्किट ब्रेक लगाइ सो दिनको बाँकी अवधिको कारोबार पूर्ण रुपमा बन्द गरिन्छ ।
