काठमाडौं । बैंकिङ प्रणालीमा अधिक तरलता (लगानीयोग्य रकम) थुप्रिएपछि नेपाल राष्ट्र बैंकलाई दिनदिनै पैसा खिच्नुपर्ने बाध्यता आइलागेको छ ।
यससाता मंगलबारदेखि दैनिक प्रणालीबाट पैसा खिच्दै आएको राष्ट्र बैंकले आज पनि २० अर्ब खिच्ने भएको हो । यसअघिका दुई दिनमा ५० अर्ब रुपैयाँ तानेको राष्ट्र बैंकले आज निक्षेप बोलकलोलमार्फत थप २० अर्ब खिच्न लागेको हो ।
राष्ट्र बैंकले १४ दिनका लागि उक्त रकम व्यवस्थापन गर्न लागेको हो । उक्त रकममा साँवा र ब्याज भुक्तानी फागुन ३ गते गरिने राष्ट्र बैंकले जनाएको छ ।
बोलकबोलमा क, ख र ग वर्गका बैंक तथा वित्तीय संस्थाले भाग लिन पाउने छन् । इच्छुक बैंक तथा वित्तीय संस्थाले आज दिउँसो ३ बजेसम्म आवेदन दिनसक्ने राष्ट्र बैंकले जनाएको छ । बैंक तथा वित्तीय संस्थाहरूले कम्तीमा १० करोड र बढीमा ५ करोडले भाग जाने गरी जति रकम पनि बोलकबोल गर्न सक्नेछन् ।
विगत लामो समयदेखि कर्जाको माग नबढ्दा र एकोहोरो निक्षेप थपिरहँदा प्रणालीमा अधिक तरलता कायम भएको हो । हाल प्रणालीमा साढे ६ खर्ब रुपैयाँ बढी तरलता थुप्रिएको छ । यससँगै कर्जा निक्षेप अनुपात (सीडी रेसियो) ८० प्रतिशतमा झरेको छ ।
