काठमाडौं । नेपाल बीमा प्राधिकरणले पुनर्बीमा कम्पनीको चुक्ता बढाउने निर्णय गरेको छ । प्राधिकरण सञ्चालक समितिको बुधबार बसेको बैठकले पुनबीमा कम्पनीहरुको न्यूनतम चुक्ता पूँजी २० अर्ब पुर्याउने निर्णय गरेको हो ।
ठूलो जोखिम बहन गर्ने कम्पनी बलियो हुनुपर्ने भन्दै प्राधिकरणले पुनर्बीमा कम्पनीहरुको पूँजी वृद्धि गर्ने निर्णय गरेको हो । प्राधिकरणले पुनर्बीमा कम्पनीलाई १५ दिन भित्र पूँजी वृद्धिको योजना पेश गर्न निर्देशन समेत दिएको छ ।
प्राधिकरण अनुसार पुनर्बीमा कम्पनीहरुले अब २०८१ माघ मसान्तसम्म चुक्ता पूँजी पुर्याउनुपर्नेछ ।
हाल नेपालमा दुई वटा पुनर्बीमा कम्पनी संचालनमा छन् । सरकारी स्वामित्वको नेपाल पुनर्बीमा कम्पनी र निजी क्षेत्रको लगानीको हिमालयन रि-इन्स्योरेन्स रहेका छन् ।
हाल नेपाल पुनर्बीमाको कम्पनीको चुक्ता पूँजी १२ अर्ब ८१ करोड ३५ लाख ४३ हजार रुपैयाँ रहेको छ । अब प्राधिकरणले तोकेको पूँजी पुर्याउन यस कम्पनीले ७ अर्ब १८ करोड ६४ लाख ५७ हजार रुपैयाँ थप्नुपर्नेछ ।
निजी क्षेत्रको हिमालयन रिले भने चुक्ता पूँजी दोब्बरले बढाउनु पर्ने भएको छ । गत महिना मात्रै आइपीओ सूचीकृत गरेको कम्पनीको हाल चुक्ता पूँजी १० करोड रुपैयाँ रहेको छ । अब २० अर्ब पुर्याउन कम्पनीले १० अर्ब रुपैयाँ पूँजी थप्नु पर्नेछ ।
प्राधिकरणले यसअघि जीवन र निर्जीवन बीमा कम्पनीहरूको चुक्ता पूँजी साढे दुई गुणाले बढाएको थियो । साविकमा २ अर्ब चुक्ता पूँजी रहेको जीवन बीमा कम्पनीको ५ अर्ब र १ अर्ब चुक्ता पूँजी रहेका निर्जीवन बीमालाई साढे २ अर्ब पुर्याउन निर्देशन दिएको थियो ।
गत असार मसान्तसम्म चुक्ता पूँजी पुर्याउन निर्देशन दिए पनि हालसम्म आधा मात्रै कम्पनीले तोकिएको पूँजी पुर्याएका छन् ।
