काठमाडौं । चालु आर्थिक वर्षको पाँच महिना (साउन–मंसिर)मा वाणिज्य बैंकहरूले झन्डै साढे २८ अर्ब रुपैयाँ खुद नाफा कमाएका छन् । नेपाल राष्ट्र बैंकले सार्वजनिक गरेको तथ्यांक अनुसार मंसिरसम्म २० वटा वाणिज्य बैंकहरूले २८ अर्ब ३६ करोड रुपैयाँ खुद नाफा कमाएका हुन् ।
मंसिर महिनामा मात्रै वाणिज्य बैंकहरूले ७ अर्ब ६४ करोड रुपैयाँ नाफा कमाएको राष्ट्र बैंकको तथ्यांकले देखाएको छ । गत कात्तिकसम्ममा बैंकहरूले कुल २० अर्ब ७२ करोड रुपैयाँ नाफा कमाएका थिए भने कात्तिकमा बढेर २८ अर्ब ३६ करोड रुपैयाँ पुगेको छ ।
बैंकहरूले कात्तिक र मंसिरमा लगातार ७ अर्ब बढी नाफा कमाएका हुन् । पछिल्लो समय बैंकिङ प्रणालीमा अधिक तरलता भए पनि कर्जाको माग नहुँदा बैंकहरूले उल्लेख्य रूपमा व्यवसाय विस्तार गर्न सकेका छैनन् । तर, विगतमा महँगो ब्याजमा कर्जा लगानी गरेकाले अहिले व्यवसाय विस्तार नहुँदा पनि नाफा कमाएका हुन् ।
कात्तिक यता निक्षेपको ब्याजदर लगातार घटेको छ । सोसँगै कर्जाको ब्याज पनि केही घटेको छ । तर, अझै पनि कर्जाको माग दोहोरो अंकमै रहेको र अपेक्षित रूपमा आर्थिक गतिविधि नबढ्दा कर्जाको माग बढ्न नसकेको व्यवसायीहरूको भनाइ छ । यद्यपि, पछिल्लो समय नेपाल राष्ट्र बैंकले गरेको नीतिगत सहजत र घट्दो ब्याजदरले कर्जाको माग केही बढ्न थालेको बैंकरहरू बताउँछन् ।
अहिले बैंकिङ प्रणालीमा अधिक तरलता छ । बैंकहरूसँग साढे ६ खर्ब बढी लगानी योग्य रकम छ । प्रणालीमै पैसा थुप्रिएर बसे पनि कर्जाको माग बढ्न सकेको छैन भने बैंकहरू पनि जोखिम मोलेर लगानी गर्न तयार छैनन् । विगतमा गरिएको कर्जा असुलीमा देखिएको समस्या र बढ्दो खराब कर्जाले बैंकहरू माग भए पनि जोखिमयुक्त क्षेत्रमा कर्जा लगानी गर्न डराइ रहेका छन् ।
चालु आवको ५ महिनामा वाणिज्य बैंकहरूले सवा १ खर्ब मात्रै कर्जा लगानी गरेका छन् । राष्ट्र बैंकले चालु आवमा निजीक्षेत्रतर्फ ११.५ प्रतिशत कर्जा विस्तारको लक्ष्य राखेको छ । सो अनुसार वर्ष दिनमा ५ खर्ब ६० अर्ब बढी कर्जा लगानी हुनुपर्छ । तर, ४ महिनामा लक्ष्यको करिब २१ प्रतिशत मात्र कर्जा विस्तार गरेको छ ।
पछिल्लो समय सरकार र राष्ट्र बैंकले गरेका नीतिगत लचकताले अर्थतन्त्र केही चलायमान हुन थालेको संकेत देखिएको छ । घट्दो ब्याजदर र आर्थिक गतिविधि बढ्न थालेकाले आगामी दिनमा कर्जाको माग बढ्ने बैंकहरूको अपेक्षा ।
कुन बैंकले कति कमाए ?
मंसिरसम्म २० वाणिज्य बैंकमध्ये १४ बैंक अर्बपति क्लबमा प्रवेश गरेका छन् भने ३ बैंकले २ अर्ब बढी नाफा कमाएका छन् । जसमा नबिल बैंक सबैभन्दा धेरै नाफा कमाउने बैंक बनेको छ । मंसिरसम्म नबिल बैंकले सर्वाधिक २ अर्ब ९६ करोड ९३ लाख लाख रुपैयाँ नाफा कमाएको छ ।
खुद नाफामा ग्लोबलले नबिललाई पछ्याएको छ । यस अवधिमा ग्लोबलले २ अर्ब ७३ करोड ७९ लाख रुपैयाँ कमाएको छ । मंसिरसम्म नेपाल इन्भेष्टमेन्ट बैंकले पनि २ अर्ब ६० करोड ९० लाख रुपैयाँ नाफा कमाएको छ ।
त्यसैगरी, प्राइम कमर्शियलले १ अर्ब ९२ करोड, एनआइसी एशिया १ अर्ब ८५ करोड, हिमालयन बैंक १ अर्ब ८० करोड, प्रभु बैंक १ अर्ब ४९ करोड, एनएमबी बैंक १ अर्ब ४५ करोड, राष्ट्रिय वाणिज्य बैंकले १ अर्ब ४१ करोड रुपैयाँ खुद नाफा कमाएका छन् ।
त्यस्तै, एभरेष्ट बैंक्ले १ अर्ब ४० करोड, कुमारी १ अर्ब ३० करोड, स्ट्याण्डर्ड चार्टर्ड १ अर्ब २५ करोड, नेपाल बैंक १ अर्ब २१ करोड र सानिमा बैंक १ अर्ब ७ करोड रुपैयाँ नाफा कमाएको छ ।
मंसिरसम्म ६ बैंकको नाफा भने १ अर्ब रुपैयाँभन्दा कम छ । जसमा सानिमा ८९ करोड, माछापुच्छ्रे ७६ करोड, सिटिजन्स ७४ करोड, नेपाल एसबीआइ ७० करोड, सिद्धार्थ ६२ करोड र कृषि विकास बैंकले सबैभन्दा कम १२ करोड ५० लाख रुपैयाँ नाफा कमाएको छ ।
