काठमाडौं । एनआइसी एशिया बैंकले देशका विभिन्न ठाउँमा आफ्नो स्वामित्वमा रहेको घरजग्गा (गैर बैंकिङ सम्पत्ति) बेच्ने भएको छ । बैंकले एक सूचना जारी गर्दै २० जिल्लाको विभिन्न ७२ स्थानमा रहेको घरजग्गा बिक्री गर्ने जानकारी गराएको हो ।
बैंकले विभिन्न समयमा ऋणीको धितो लिलाम हुन नसकेर आफूले सकारेको गैर बैंकिङ सम्पत्तिको रुपमा रहेका घरजग्गा जे जस्तो अवस्थामा छ सोही अवस्थामा बिक्री गर्न लागेको हो ।
बैंकले काठमाडौं उपत्यकासहित चितवन, झापा, मोरङ, सुनसरी, कास्की, सिरहा, बाँके, रुपन्देही, बारा, पर्वत, पर्सा, सुर्खेत, बर्दिया लगायत स्थानको घरजग्गा बेच्ने भएको हो ।
उक्त सम्पत्ति खरिद गर्न इच्छुक व्यक्ति, फर्म, कम्पनी, संघ संस्थाहरुले आजको ७ दिन भित्र गोप्य शिलबन्दी पेश गर्नुपर्ने बैंकले जनाएको छ ।
ऋणीले समयमै कर्जा तिर्न नसकेपछि धितो राखिएको सम्पत्ति बैंकहरुले लिलामी गर्नुपर्ने हुन्छ । उक्त लिलामी बिक्री नभएमा बैंकले आफैंले सकार्न पाउँछन् । तर, धितो सकार्दा बैंकहरूले बढीमा १५० रोपनी जग्गा मात्र आफ्नो नाममा राख्न पाउँछन् । सीमाभन्दा बढी भएपछि बैंकहरूले त्यस्तो सम्पत्ति बेच्ने गरेका छन् ।
