काठमाडौं । ट्रेकिङ एजेन्सी एसोशिएसन (टान) ले भ्रमण वर्ष २०२० का लागि नयाँ ट्रेकिङ रुटको अध्ययन सुरु गरेको छ । टानले ५ वटा नयाँ पद मार्गको अध्ययन सुरु गरेको हो ।
टानका उपाध्यक्ष चोलेन्द्र बहादुर कार्कीका अनुसार सुदुरपूर्व, अन्नपूर्ण लगायतका पिछडिएका स्थानहरुमा नयाँ पदमार्गको अध्ययन सुरु भएको हो ।
उनले जनवरी अघिनै नयाँ अत्यन्त आकर्षक ५ ट्रेकिङ मार्गको अध्ययन पुरा गरी पदमार्गको विषयमा प्रचारप्रसार गरिने बताए । ट्रेकिङ जान चाहानेलाई पर्यटन वर्षमा विशेष छुटको समेत व्यवस्था गरिने उनले जानकारी दिए ।
‘पर्यटन वर्षमा हामीले नयाँ पदमार्ग खुल्ला गर्ने छौँ, साथै केही स्पेशल छुटको पनि व्यवस्था गरिनेछ,’ कार्कीले चाणक्य पोष्टसँग भने ।
टानले यो पटक नेपाल घुम्न आउने मध्ये ७० प्रतिशत पर्यटकलाई पदयात्रा गराउने लक्ष्य राखेको छ । हाल नेपालमा आउने पर्यटन मध्ये ३० देखि ४० प्रतिशतले मात्र पद यात्रा गर्ने गरेका छन् ।
उनले पर्यटकलाई आकर्षण गर्न ट्रेकिङ शुल्कमा २० देखि ३० प्रतिशतसम्म छुटको व्यवस्था गरिन लागेको जानकारी दिए ।
यससँगै टानले एडभेन्चर ट्राभल मार्टको समेत योजना बनाएको पूर्वअध्यक्ष नवराज दाहालले जानकारी दिए ।
नेपालमा १ हजार ८ सय बढि ट्रेकिङ एजेन्सीहरु रहेका छन् । ती मध्ये १ हजार ६ सय ट्रेकिङ कम्पनीहरु टानमा रहेका छन् ।
नेपालमा १ सयभन्दा बढि ट्रेकिङ रुटहरु रहेका छन् । ति मध्ये एभरेष्ट बेस क्याम्प, अन्नपूर्ण बेस क्याम्प, घोरेपानी पुन हिल, मनाङ, मुस्ताङ, मनास्तु लगायतका ट्रेकिङ रुटहरु धेरै रुचाइनेमा पर्छ ।
ट्रेकिङ जाँदा विदेशीहरुलाई न्यूनतम १२ सय डलरदेखि माथी रकम लिइने गरेको छ । यस्तै फुड लजिङ सहितको व्यवस्ता अनुसार ट्रेकिङ चार्ज फरक पर्ने टानका द्धितिय उपाध्यक्ष भरत सापकोटाले जानकारी दिए ।
उनले पर्यटकहरुले आफ्नो रुची र सुविधा अनुसार जस्तो पनि ट्रेकिङ गर्न सक्ने बताए ।
गत आर्थिक वर्षमा कुल ११ लाख ७३ हजार पर्यटन नेपाल भित्रिएका थिए । यो भ्रमण वर्ष २०२० मा कुल २० लाख पर्यटन भित्राउने योजना सरकारले बनाएको छ ।
