काठमाडौं । नेपालको चर्चित व्यवसायिक घराना लक्ष्मी ग्रुपले आफ्नो स्थापनाको ५० औं वर्ष पूरा गरेको छ । वि.सं. २०३० पुस ५ गतेदेखि व्ययवसाय सुरू गरेको यस ग्रुपले बिहीबार आफ्नो यात्राको ५ दशक पूरा गरेको हो ।
ग्रुपका अध्यक्ष गणेशबहादुर श्रेष्ठ र उनका दाइ बुद्धिबहादुर श्रेष्ठले पोखराबाट सुरू गरेको व्यवसाय अहिले देशभर फैलिएको छ । अहिले ग्रुपको व्यवसाय बुबा गणेशको नेतृत्वमा दोस्रो पुस्ताले सम्हालिरहेको छ ।
५ दशक अघि मिठाई (पुष्टकारी) पसलबाट सुरू भएको ग्रुपको व्यवसाय अहिले डेढ दर्जन बढी क्षेत्रमा ‘डाभर्सीफाइ’ भएको छ । ग्रुपले अहिले चकलेट, डेरी, अटोमोबोइल, इलेक्ट्रोनिक्स, ट्रेडिङ, प्लास्टिक, स्टिल लगायत उद्योग संचालनमा छन् ।
ग्रुप अन्तर्गत सुजल फुड प्रालि, सुजल डेरी प्रालि, सुजल प्लास्टिक, लक्ष्मी इन्टरकन्टिनेन्टल (हुन्डाईको आधिकारिक बिक्रेता), इसुजु, सिद्धि लक्ष्मी स्टिल्स, जयमाँ इन्टरकन्टिनेन्टल, लगायत उद्योग, व्यवसायहरु पर्दछन् ।
मिठाइ व्यापारबाट सुरू भएको लक्ष्मीको व्यवसायिक यात्रा क्रमशः उद्योगतर्फ मोडियो । वि.सं. २०३९ सालमा शुभ लक्ष्मी कन्फेक्शनरी कम्पनी खोली लोफ्टी क्यान्डी उत्पादन थालेको थियो । २०४६ सालमा भारतले नाकाबन्दी लगाएपछि लक्ष्मीले देशलाई प्लाष्टिकमा आत्मनिर्भर बनाउने उद्देश्यका साथ जय पोलिथिन उद्योग खोलेको थियो ।
२०४८ मा सूर्य कन्फेक्शनरी उद्योग स्थापना गरेको ग्रुपले २०५४ मा चर्चित चकलेट ब्रान्ड बजारमा ल्यायो । ग्रुपले आफ्नो व्यवसाय विस्तारको क्रममा २०६१ सालमा दूग्धजन्य उद्योगको हात हाल्यो । सुजल डेरी स्थापन गरी पाश्चराइज्ड दूधदेखि लिएर चिज, पनीर, दही, अन्य विभिन्न दुग्धजन्य उत्पादनहरू उत्पादन गर्दै आएको छ ।
डेरी उद्योग संचालनमा ल्याएको १ वष्र्मपछि ग्रुपले अटोमोबाइल व्यवसाय सुरू गर्यो । २०६३ देखि अटोमोबाइल्स व्यसाय संचालन गर्दै आएको ग्रुपले २०६६ देखि हुण्डाईको नेपालको आधिकारिक वितरकको रूपमा रहँदै आएको छ ।
सन् २०१६ मा इलेक्ट्रोनिक्स उद्योगमा प्रवेश गरेको लक्ष्मीले २०७६ देखि सिद्धि लक्ष्मी स्टील्स उद्योग स्थापन गरेको थियो । विगत ३ वर्षदेखि उद्योगबाट उत्पादित डण्डीहरू बजारमा बिक्री हुँदै आएका छन् । उद्योगको वार्षिक उत्पादन क्षमता २ लाख टन रहेको छ ।
देशभर डेढ दर्जन बढी कम्पनी संचालनमा ल्याएको ग्रुपले ३ हजार बढीलाई प्रत्यक्ष र हजारौंलाई अप्रत्यक्ष रूपमा रोजगारी दिएको छ । साथै, राज्यलाई वर्षेनी करोडौं रुपैयाँ कर तिर्दै आएको छ । आगामी दिनमा पर्यटन लगायत सेवा क्षेत्रमा लगानी विस्तार गर्ने ग्रुपको योजना छ ।
