काठमाडौं । चालु आर्थिक वर्षको चार महिना (साउन–कात्तिक) वाणिज्य बैंकहरूले पौने २१ अर्ब रुपैयाँ खुद नाफा कमाएका छन् । नेपाल राष्ट्र बैंकले सार्वजनिक गरेको तथ्यांक अनुसार कात्तिकसम्म २० वटा वाणिज्य बैंकहरूले २० अर्ब ७३ करोड रुपैयाँ खुद नाफा कमाएका हुन् ।
कात्तिक महिनामा मात्रै वाणिज्य बैंकहरूले ७ अर्ब २६ करोड रुपैयाँ नाफा कमाएको राष्ट्र बैंकको तथ्यांकले देखाएको छ । गत असोजसम्ममा बैंकहरूले कुल १३ अर्ब ४७ करोड रुपैयाँ नाफा कमाएका थिए भने कात्तिकमा बढेर २० अर्ब ७३ करोड रुपैयाँ पुगेको छ ।
चालु आवको असोजमा खस्किएको बैंकहरूको नाफा कात्तिकमा सुधार आएको हो । पछिल्लो समय बैंकिङ प्रणालीमा अधिक तरलता भए पनि कर्जाको माग नहुँदा बैंकहरूले उल्लेख्य रुपमा व्यवसाय विस्तार गर्न सकेका छैनन् । जसको असर नाफामा देखिएको हो ।
अर्थतन्त्रमा आएको संकुचन र महँगो ब्याजका कारण कर्जाको माग बढ्न नसकेको व्यवसायीको भनाइ छ । यद्यपि, पछिल्लो समय नेपाल राष्ट्र बैंकले गरेको नीतिगत सहजतका कारण बैंकको ब्याजदर घट्दो क्रममा छ भने कर्जाको माग पनि क्रमशः बढ्न थालेको छ ।
चालु आवको ४ महिनामा वाणिज्य बैंकहरूले करिब १ खर्ब मात्रै कर्जा लगानी गरेका छन् । राष्ट्र बैंकले चालु आवमा निजीक्षेत्रतर्फ ११.५ प्रतिशत कर्जा विस्तारको लक्ष्य राखेको छ । सो अनुसार वर्ष दिनमा ५ खर्ब ६० अर्ब बढी कर्जा लगानी हुनुपर्छ । तर, ४ महिनामा लक्ष्यको करिब १८ प्रतिशत मात्र कर्जा विस्तार गरेको छ ।
यस्तै, आर्थिक मन्दीका कारण व्यवसायीको ऋण तिर्ने क्षमतामा ह्रास आउँदा पनि नाफा प्रभावित भएको बैंकरहरू बताउँछन् । समयमै कर्जा असुली नहुँदा खराब कर्जा बढ्न जाँदा बैंकहरूको प्रोभिजनिङ दायित्व बढ्छ ।
पछिल्लो समय सरकार र राष्ट्र बैंकले गरेका नीतिगत लचकताले अर्थतन्त्र केही चलायमान हुन थालेको संकेत देखिएको छ । घट्दो ब्याजदर र आर्थिक गतिविधि बढ्न थालेकाले आगामी दिनमा कर्जाको माग बढ्ने बैंकहरूको अपेक्षा ।
कुन बैंकले कति कमाए ?
कात्तिकसम्म नबिल बैंकले सर्वाधिक २ अर्ब १६ करोड खुद नाफा कमाएको छ । ९ वटा बैंकले १ अर्ब बढी नाफा कमाएका छन् । ग्लोबल आइएमई १ अर्ब ९४ करोड, नेपाल इन्भेष्टमेन्ट मेगा १ अर्ब ८६ करोड, प्राइम कमर्शियल १ अर्ब ५३ करोड, हिमालयनले १ अर्ब ५० करोड रुपैयाँ नाफा कमाएको छ ।
त्यस्तै, एनआइसी एशिया १ अर्ब ३७ करोड, एनएमबी १ अर्ब २३ करोड, राष्ट्रिय वाणिज्य बैंक १ अर्ब २० करोड, एभरेष्ट बैंक १ अर्ब ८ करोड र प्रभु बैंकले १ अर्ब ५ करोड नाफा कमाएका छन् ।
समीक्षा अवधिमा ८ बैंकको नाफा १ अर्बभन्दा कम रहेको छ । स्ट्याण्डर्ड चार्टर्ड ९८ करोड, कुमारी ८८ करोड, सानिमा ७७ करोड, माछापुच्छ्रे ६७ करोड, नेपाल बैंक ६६ करोड, नेपाल एसबीआई ६० करोड, सिटिजन्स ५८ करोड, लक्ष्मी सनराइज ५१ र सिद्धार्थ बैंकले ३३ करोड नाफा कमाएको छ ।
यस अवधिमा सरकारी स्वामित्वको कृषि विकास बैंक भने नोक्सानीमा गएको छ । कात्तिकसम्म कृषि विकास २७ करोड ८८ लाख रुपैयाँ घाटामा छ ।
