काठमाडौं । कुमारी बैंकले फेरि निक्षेपको ब्याजदर घटाएको छ । गत शनिबार मात्रै निक्षेपको ब्याजदर घटाएको कुमारीले एक साता नबित्दै फेरि आज ब्याजदर घटाएको हो ।
कुमारीले घटाएको ब्याजदर पुस १ गतेदेखि लागू हुनेछ । बैंकले अब व्यक्तिगत मुद्दतीमा न्यूनतम ७.७५ प्रतिशत र ५ वर्ष माथिको मुद्दतीमा ९.३१ प्रतिशत ब्याजदर दिने भएको छ ।
त्यस्तै, संस्थागत मुद्दती निक्षेपमा १ वर्षभन्दा कम अवधिकोमा ६.७५ प्रतिशत र १ वर्ष बढीकोमा ७.३१ प्रतिशत ब्इाजद दिने भएको छ ।
नेपाल राष्ट्र बैंकले नीतिगत दरहरू घटाएसँगै कुमारीले गत शनिबार निक्षेपको ब्याजदर १०.०१ प्रतिशतबाट घटाएर ९.६१ प्रतिशतमा झारेको थियो । यस्तै, बैंकले (फोन लोन र क्रेडिट कार्ड बाहेक) सबै कर्जामा ३.५ प्रतिशत मात्रै प्रिमियम जोडेर ऋण दिने जनाएको छ ।
पछिल्लो समय बैंकिङ प्रणालीमा अधिक तरलता कायम भएको र राष्ट्र बैंकले समेत नीतिगत दरहरू घटाएकाले बैंकहरूले धमाधम ब्याजदर घटाउन थालेका छन् ।
