काठमाडौं । चालु आर्थिक वर्ष २०७९/८० मा रेमिट्यान्स आप्रवाहमा उल्लेख्य सुधार भएको छ । नेपाल राष्ट्र बैंकले बिहीबार सार्वजनिक गरेको चालु आवको चार महिना (कात्तिक)सम्मको तथ्यांक अनुसार विप्रेषण आप्रवाह २६.४ प्रतिशतले वृद्धि भएको हो ।
राष्ट्र बैंकका अनुसार चालु वर्षको कात्तिक मसान्तसम्म कुल ४ खर्ब ७७ अर्ब ९६ करोड रुपैयाँ रेमिट्यान्स भित्रिएको छ । औसतमा चालु वर्षमा हरेक महिना १ खर्ब १९ अर्ब विप्रेषण नेपाल भित्रिएको छ ।
चालु आवमा वैदेशिक रोजगारीमा जाने कामदारको संख्यामा घटे पनि अघिल्लो वर्षमा ७ लाख बढी विदेशिएकाले रेमिट्यान्स आप्रवाह बढेको हो । साथै, वैधानिक तवरबाटै विप्रेषण भित्रने क्रम पनि बढेकाले आप्रवाहमा सुधार देखिएको हो ।
विदेश जाने घटे
समीक्षा अवधिमा वैदेशिक रोजगारीमा जानेको संख्या भने २८ प्रतिशतले घटेको छ । गत वर्ष कात्तिकसम्म २ लाख ८४ हजार बढी विदेशिएकामा चालु वर्षमा घटेर २ लाख ५ हजारमा सीमित भएका छन् ।
समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या १ लाख ३७ हजार ४७५ र पुनः श्रम स्वीकृति लिनेको संख्या ६८ हजार ८४१ रहेको छ । अघिल्लो वर्षको सोही अवधिमा यस्तो संख्या क्रमशः १ लाख ९६ हजार ७३५ र ८७ हजार ४२८ रहेकोथियो ।
