काठमाडौं । नेपाली बजारमा सुनको मूल्यले दिनदिनै नयाँ रेकर्ड बनाउन थालेको छ । हिजो मात्रै इतिहासकै महँगोको रेकर्ड बनाएको सुनको मूल्यले आज फेरि नयाँ रेकर्ड बनाएको हो ।
नेपाल सुनचाँदी व्यवसायी महासंघका अनुसार मंगलबार छापावाल सुनको भाउ प्रतितोला ३०० रुपैयाँले बढेर १ लाख १७ हजार ७०० रुपैयाँ पुगेको छ । यो नेपाली बजारमा अहिलेसम्मकै महँगो हो । यसअघि सोमाबार १ लाख १७ हजार ४०० रुपैयाँ पुगेको थियो ।
महासंघका अनुसार आज तेजावी सुनको भाउ पनि प्रतितोला ३०० रुपैयाँ बढेर १ लाख १७ हजार १५० रुपैयाँ पुगेको छ ।
अन्तर्राष्ट्रिय बजारमा सुनको भाउ बढेसँगै नेपाली बजारमा पनि आकाशिएको हो । चाडवाडको सिजन सकिए पनि विहेको सिजनका कारण बजारमा सुनको माग बढेको व्यवसायीहरू बताउँछन् । आज अन्तर्राष्ट्रिय बजारमा भने सुन प्रतिऔंस २ हजार ०१४.८० अमेरिकी डलरमा कारोबार भइरहेको छ।
त्यस्तै, आज चाँदीको मूल्य भने स्थिर रहेको छ । आजका लागि चाँदीको भाउ प्रतितोला १ हजार ५०० रुपैयाँ तोकिएको छ ।
