काठमाडौं । स्ट्याण्डर्ड चार्टर्ड बैंक नेपाली सेयर बजारमा सबैभन्दा महँगो सेयर मूल्य हुने वाणिज्य बैंक बनेको छ । नबिल बैंकलाई उछिन्द स्ट्याण्डर्ड सबैभन्दा धेरै सेयर मूल्य हुने बैंक बनेको हो ।
नबिल बैंकले गत आर्थिक वर्ष २०७९/८० को मुनाफाबाट ११ प्रतिशत मात्र नगद लाभांश घोषणा गरेपछि बैंकको सेयर मूल्यमा उच्च गिरावट आएपछि चार्टर्डले उछिनेको हो ।
नेपाल स्टक एक्सचेन्ज (नेप्से)का अनुसार आज बिहान ११ः१० बजेसम्म नबिल बैंकको सेयर मूल्य प्रतिकित्ता ४४ रुपैयाँ घटेर ५१७ रुपैयाँमा कारोबार भइरहेको छ । जबकि यही समयमा चार्टर्डको सेयर मूल्य पनि प्रतिकित्ता ५२४ रुपैयाँमा कारोबार भइरहेको छ ।
लाभांश कम दिएको झोकमा लगानीकर्ताले नबिलको बिक्रीचाप बढाउँदा सेयर मूल्य ह्वात्तै घटेको हो । अघिल्लो कारोबार दिनमा नबिलको अन्तिम कारोबार मूल्य प्रतिकित्ता ५६१ रुपैयाँ थियो भने चार्टर्ड ५३९ रुपैयाँ थियो
विगतका वर्षहरूमा बम्पर लाभांश दिँदै आएको नबिलले यसपटक इतिहासकै कम लाभांश दिएको हो । यता चार्टर्डले भने गत वर्षको नाफाबाट १९ प्रतिशत नगद लाभांश घोषणा गरेको छ ।
विगतका बुलमा चार्टर्डको सेयर मूल्य प्रतिकित्ता ९ हजार रुपैयाँसम्म पुगेको थियो भने पछिल्ला वर्षहरूमा लगातार घटेर ३०० रुपैयाँभन्दा तल समेत आएको थियो । यद्यपि, पछिल्लो १ वर्ष यता भने चार्टर्डको सेयर मूल्य बढ्दो क्रममा छ ।
