काठमाडौं । आज बेलुका काठमाडौंको दशरथ रंगशालामा विश्वकप छनोट अन्तर्गत हुने नेपाल र यमन बीचको फुटबल हेर्न जाने दर्शकलाई निःशुल्क बसको व्यवस्था गरिएको छ ।
अखिल नेपाल फुटबल संघ (एन्फा)खेल हेर्न जाने दर्शकको सुविधाका लागि निःशुल्क बसको व्यवस्था गरेको हो । एन्फाका अनुसार यात्रु ओसार्न विभिन्न ११ रुटमा १५ वटा निःशुल्क बसको व्यवस्था गरिएको छ ।
त्रिपुरेश्वर-थानकोट, सुन्धारा-नारायणथान, सुन्धरा-जोरपाटी, त्रिपुरेश्वर-हात्तीवन र त्रिपुरेश्वर-सूर्यविनायक रुटमा २/२ वटा बसको व्यवस्था गरिएको एन्फाले जनाएको छ । त्यस्तै, सुन्धरा-सिनामंगल, त्रिपुरेश्वर-कीर्तिपुर, सुन्धारा-चक्रपथ, त्रिपुरेश्वर-स्वयम्भू र त्रिपुरेश्वर-भैँसेपाटी रुटमा १/१ निःशुलक बसको व्यवस्था गरिएको छ ।
सन् २०२६ मा हुने विश्वकपका लागि छनोटका हुने नेपाल र यमन बीचकाे खेल आज साँझ ७ बजे सुरु हुनेछ । नेपाल र यमन यसअघि चार पटक आमनेसामने भइसकेका छन्। सन् २००० मा भएको एशियन कपको छनोट खेलमा नेपाल यमनसँग ३-० गोल अन्तरले पराजित भएको थियो।
त्यस्तै, सन् २०१४ मा भएको अन्तर्राष्ट्रिय मैत्रीपूर्ण खेलमा नेपालले २-० को हार बेहोरेको थियो। त्यसपछि सन् २०१७ को एशियन कप छनोटमा नेपालले यमनलाई गोलरहित बराबरीमा रोकेको थियो।
एन्फाले टिकटको मूल्य साधारण प्याराफिटतर्फ ४०० रुपैयाँ र भीआइपी प्याराफिटतर्फ १ हजार रुपैयाँ कायम गरेको छ ।
