काठमाडौं । तिहार लागेसँगै फूलको व्यापार बढेको हो । अधिकांश मानिसले फूलको मालाले घर, अफिस सजाउने हुँदा फूलमालाको व्यापार ह्वात्तै बढेको हो ।
गाउँघरमा फूलमालाको खासै किनबेच नहुने भए पनि शहरमा भने वर्षकै धेरै फूलमाला किनबेच हुन्छ । तिहारलाई लक्षित गर्दै देशका विभिन्न ठाउँमा फूलखेती गरेका किसानहरु माला बनाएर बेच्न शहर आएका छन् ।
तिहारका लागि काठमाडौँको न्यूरोडमा व्यापारीले बिक्री गर्न राखेको सयपत्री फूलको माला हेर्दैै विदेशी पर्यटक ।
तिहारमा मुख्यगरी सयपत्री, मखमली र गोदावरी फूल धेरै खपत हुन्छ । त्यसमा पनि सयपत्री फूलको मालाको व्यापार धेरै हुने व्यापारीहरु बताउँछन् ।
तिहारलाई मध्येनजर गर्दै काठमाडौं महानगरपालिकाले पनि विभिन्न चार ठाउँमा फूल बेच्न दिएको छ । अरु बेला सडक व्यापारमा प्रतिबन्ध लगाएको महानगरले तिहारको बेला भृकुटीमण्डप, तीनकुने, बालाजुस्थित भ्याली कोल्डस्टोर र हाँडीगाउँ कृष्णमन्दिर नजिक फूल बिक्रीस्थल तोकेको छ ।
बजारमा सयपत्री फूलको एउटा मालाको मूल्य ७० रुपैयाँदेखि ५०० रुपैयाँसम्म रहको । त्यस्तै, मखमली र गोदावरी फूलको मालाको १०० हाराहारी रहको छ । तिहारमा मात्रै करोडौंको फूलमालाको व्यापार हुने गर्छ ।
