काठमाडौं । हाथवे इन्भेष्टमेन्ट नेपाल लिमिटेडको खुद नाफा साढे १६ गुणाले बढेको छ । कम्पनीले सार्वजनिक गरेको चालु आर्थिक वर्ष २०८०/८१ को पहिलो त्रैमासिक अपरिष्कृत वित्तीय विवरण अनुसार खुद नाफा १५५८.४९ प्रतिशतले बढेको छ ।
चालु आवको असोज मसान्तसम्म कम्पनीले १ करोड ५८ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा डेढ करोड बढी हो । कम्पनीले गत वर्ष पहिलो त्रैमासमा ९ लाख ५४ हजार रुपैयाँ खुद नाफा कमाएको थियो ।
समीक्षा अवधिमा कम्पनीको कुल आम्दानी ५४ प्रतिशतले घटे पनि खर्च घट्दा नाफामा उल्लेख्य सुधार आएको हो ।
असोजसम्म कम्पनीको कुल आम्दानी ५४.१९ प्रतिशतले घटेर २ करोड १९ लाखमा सीमित भएको छ । त्यस्तै, यस अवधिमा कम्पनी संचालन आम्दानी ५४.३६ प्रतिशतले घटेर २ करोड १९ लाखमै सीमित भएको छ ।
असोजसम्म कम्पनीको खर्च ७२.८५ प्रतिशतले घटेर १ करोड ५५ लाखमा सीमित भएको छ । गत वर्ष कम्पनीको खर्च ५ करोड ७१ लाख रुपैयाँ थियो ।
हाल १ अर्ब १७ करोड रुपैयाँ चुक्ता पूँजी रहेको कम्पनीको जगेडा कोषमा ७० करोड ७५ लाख रुपैयाँ संचिति छ ।
नाफा बढेसँगै कम्पनीको प्रतिसेयर आम्दानी ०.३७ रुपैयाँबाट बढेर ५.४१ रुपैयाँ पुगेको छ । समीक्षा अवधिमा कम्पनीको प्रतिसेयर नेटवर्थ ८०.२४ रुपैयाँ र मूल्य आम्दानी ५२.४९ गुणा छ ।
