काठमाडौं । चालु आर्थिक वर्षको पहिलो त्रैमासमा निर्जीवन बीमा व्यवसायमा गिरावट आएको छ । अर्थतन्त्रमा देखिएको शिथिलताको असर निर्जीवन बीमा कम्पनीको व्यवसायमा देखिएको हो ।

चालु वर्षको असोज मसान्तसम्म निर्जीवन बीमा कम्पनीको कुल बीमा शुल्क ४ प्रतिशतले घटेको छ । बीमा प्राधिकरणले सार्वजनिक गरेको तथ्यांक अनुसार कम्पनीहरुले १० अर्ब ४४ करोड रुपैयाँ कुल बीमा शुल्क संकलन गरेका छन् ।

यो अघिल्लो वर्षको सोही अवधिको तुलनामा ३.९६ प्रतिशतले कम हो । गत वर्षको यही अवधिमा कम्पनीहरुले १० अर्ब ८४ करोड रुपैयाँ बीमा शुल्क आर्जन गरेका थिए । गत वर्षको पहिलो त्रैमासको तुलनामा कुल बीमा शुल्कमा ३९ करोड ६९ लाख रुपैयाँले गिरावट आउँदा बीमा लेखको संख्या ५ हजारले घटेको छ ।

यो वर्षको असोजसम्म ६ लाख ८४ हजार कुल बीमा लेख जारी गर्दा कम्पनीहरुले गत वर्षको सोही अवधिमा ६ लाख ८९ हजार बीमा लेख जारी गरेका थिए । गत वर्षदेखि आन्तरिक अर्थतन्त्र चलायमान नहुँदा व्यापार व्यवसाय बढ्न सकेको छैन । जसको कारण समग्र वित्तीय प्रणाली खल्बलिएको छ । उच्च ब्याजदर, आयस्रोतको घट्नु, महंगी बढ्नु जस्ता कारणले उपभोक्ताको खर्च गर्ने क्षमतामा ह्रास आएको छ । सोही कारण बीमा व्यवसायमा समेत धक्का लागेको देखिन्छ ।

१४ वटा निर्जीवन बीमा कम्पनी मध्ये ९ वटाको व्यवसाय वृद्धि भएको छ भने पाँचको घटेको छ । प्राधिकरणका अनुसार सबैभन्दा धेरै राष्ट्रिय बीमा कम्पनीको ५६ प्रतिशतले व्यवसाय घटेको छ ।

सिद्धार्थ प्रिमियर इस्न्योरेन्सको २० प्रतिशतले व्यवसायमा गिरावट आएको छ । नेपाल इन्स्योरेन्सको १४ प्रतिशतले व्यवसाय घटेको छ । युनाइटेड अजोड १० प्रतिशतले घटेको प्राधिकरणले जनाएको छ ।

सबैभन्दा धेरै बीमा व्यवसाय बढाउनेमा प्रभु इन्स्योरेन्स पहिलो स्थानमा छ । यो कम्पनीले ३७ प्रतिशतले व्यवसाय वृद्धि गरेको छ । हिमालयन एभरेष्ट २९ र ओरिअन्टल इन्स्योरेन्स कम्पनीले ३२ प्रतिशतले व्यवसाय बढाएको छ ।

यसअवधिमा सबैभन्दा धेरै बीमाशुल्क सगरमाथा लुम्बिनी इन्स्योरेन्सले १ अर्ब ३१ करोड रुपैयाँ बराबरको व्यवसाय गरेको छ । सिद्धार्थ प्रिमियर १ अर्ब ६ करोड, शिखर १ अर्ब ४ करोड रुपैयाँले बीमा शुल्क आर्जन गरेका छन् । सबैभन्दा कम नेशनल इन्स्योरेन्सले ३७ करोड रुपैयाँले बीमा शुल्क संकलन गरेको छ ।