काठमाडौं । माण्डु हाइड्रोपावर लिमिटेडको खुद नाफामा सुधार आएको छ । कम्पनीले बुधबार सार्वजनिक गरेको चालु आर्थिक वर्ष २०८०/८१ को पहिलो त्रैमासको अपरिष्कृत वित्तीय विवरण अनुसार खुद नाफा १३.३२ प्रतिशतले बढेको हो ।
कम्पनीले चालु आवको असोजसम्म १२ करोड ७२ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा डेढ करोड बढी हो । कम्पनीले गत वर्ष पहिलो त्रैमासमा ११ करोड २२ लाख रुपैयाँ नाफा कमाएको थियो ।
विद्युत बिक्रीबाट हुने आम्दानी बढ्दा र वित्तीय खर्च घट्दा कम्पनीको नाफामा सुधार आएको हो । असोजसम्म कम्पनीले २५ करोड १० लाख ७६ हजार रुपैयाँ बराबरको विद्युत बिक्री गरेको छ । जबकि गत वर्ष सोही अवधिमा २४ करोड ४० लाख रुपैयाँको बिजुली बेचेको थियो ।
यस अवधिमा कम्पनीको अन्य आम्दानी भने जम्मा ५४७ रुपैयाँ मात्र रहेको छ । त्यस्तै, समीक्षा अवधिमा कम्पनीको वित्तीय खर्च ७ करोड ४१ लाखबाट घटेर ६ करोड ४३ लाख रुपैयाँमा झरेको छ ।
हाल १ अर्ब ३६ करोड ३६ लाख ३७ हजार रुपैयाँ चुक्ता पूँजी रहेको कम्पनीको सेयर प्रिमियममा १७ करोड १४ हजार र रिटेन अर्निङमा ४६ करोड ४७ लाख रुपैयाँ संचित छ ।
समीक्षा अवधिमा कम्पनीको प्रतिसेयर आम्दानी ९.३३ रुपैयाँ र प्रतिसेयर नेटवर्थ १४६.५५ रुपैयाँ छ ।
