काठमाडौं । पछिल्लो समय नेपाली बजारमा प्याजको मूल्य दिनदिनै आकाशिदै गएको छ । भदौदेखि उकालो लागेको प्याजको मूल्य अहिले खुद्रा बजारमा प्रतिकेजी अढाइ सय नजिक पुगेको छ ।
दैनिक भान्सामा प्रयोग हुने प्याजको भाउ पछिल्लो तीन महिनामा मात्रै ३०९ प्रतिशत अर्थात् १७५ रुपैयाँले बढेको छ । कालिमाटी फलफूल तथा तरकारी बजारमा भदौ १ गते प्रतिकेजी ५५रुपैयाँमा खुद्रा कारोबार भएको प्याजको मूल्य मंगलबार (आज) प्रतिकेजी २ सय ३० पुगेको छ ।
सोमबारसम्म प्रतिकेजी खुद्रा प्याजको मूल्य अधिकतम दुई सय रहेकोमा मंगलबार एकै दिनमा ३० रुपैयाँले बढेको छ।
कालिमाटी बजारमा प्याजको थोक मूल्य नै प्रतिकेजी २ सय रुपैयाँ पुगेको छ । स्थानीय खुद्रा व्यापारीहरुले थोक मूल्यभन्दा ३० प्रतिशतसम्म बढीमा बेच्ने गरेकाले सर्वसाधरण महँगो मूल्य तिर्न बाध्य छन् । सरकारले नियमित बजार अनुगमन नगर्ने भएकाले व्यापारीले प्याज मनपरी भाउमा बिक्री गर्ने गरेका छन् ।
प्याजका लागि भारतमै परनिर्भर हुनुपर्ने र भारतले नेपाल प्याज निर्यातमा रोक लगाएपछि व्यापारीले अवैधानिक बाटोबाट ल्याएको प्याज झन् महँगो भएको हो । नेपाली बजारमा ९५ प्रतिशत प्याज भारतबाट आयात हुने भएकाले आयात हुन छाडेपछि बजारमा प्याजको मूल्य ह्वातै आकाशिएको हो ।
नेपालमा प्याज उत्पादनको मौसम भर्खर सुरु भएको र भारतबाट आयात नहुने भएकाले आगामी दिनमा प्याजको भाउ अझै बढ्ने सम्भावना रहेको देखिन्छ ।
चालू आर्थिक वर्षको असोज मसान्तसम्म १ अर्ब २६ करोड २ लाख रुपैयाँ बराबरको प्याज आयात भएको छ । सो अवधिमा ३ करोड ६३ लाख ५१ हजार केजी प्याज आयात भएको हो ।
भन्सार विभागको तथ्याङ्कअनुसार आर्थिक वर्ष २०७५/७६ मा कूल ५ अर्ब ६२ करोड २५ लाख रुपियाँको प्याज आयात भएको थियो । यस्तैआर्थिक वर्ष २०७४/७५ मा कूल ४ अर्ब ६६ करोड ६६ लाख रुपैयाँ बराबरको प्याज आयात भएको थियो ।
