काठमाडौं । अधिकांश वाणिज्य बैंकहरूले कात्तिक महिनाका लागि निक्षेपको ब्याजदर घटाएका छन् । बैंकिङ प्रणालीमा पर्याप्त लगानी योग्य रकम (तरलता) थुप्रिएको र कर्जाको माग समेत बढ्न नसकेपछि बैंकहरूले निक्षेपको ब्याजदर घटाएका हुन् ।
बैंकिङ प्रणालीमा अधिक तरलता हुँदाहुँदै पनि असोजमा बैंकहरूले अर्को बैंकमा रहेको निक्षेप खोस्न ब्याजदर बढाएका थिए । तर, महँगो ब्याजमा उठाएको निक्षेप कर्जा लगानी गर्न नसकपछि बैंकको उल्टो लागत बढेको थियो । अर्थतन्त्रमा आएको संकुचनका कारण कर्जाको माग बढ्न नसकेपछि बैंकहरूले बाध्य भएर ब्याजदर घटाएका हुन् ।
असोजका लागि १४ दर्जन बैंकले निक्षेपको ब्याजदर घटाएका छन् भने २ बैंकले बढाएका छन् । ४ बैंकले भने असोजकै ब्याजदर यथावत राखेका छन् । असोजको तुलनामा कात्तिकमा वाणिज्य बैंकहरूले अधिकतम् १.८३ प्रतिशत विन्दुसम्म ब्याजदर घटाएका छन् ।
कात्तिकमा एनएमबी र नेपाल एसबीआई बैंक्ले मुद्दतीको ब्याजदर बढाएका छन् भने लक्ष्मी सनराइज, सिद्धार्थ, माछापुच्छे र राष्ट्रिय वाणिज्य बैंकले असोजकै यथावत राखेका छन् । यी बाहेक अरु १४ बैंकले ब्याजदर घटाएका हुन् ।
साउनदेखि नेपाल बैंकर्स संघले ब्याजदरमा रहेको भद्र सहमती तोडेको थियो । त्यस यता बैंकहरूलाई आफूखुसी स्वतन्त्र रुपमा निक्षेपको ब्याजदर तोक्दै आएका छन् । साउनअघि संघले ब्यादरमा हस्तक्षेप गर्दा सबै बैंकको एउटै ब्याजदर हुने गरेको थियो ।
नेपाल राष्ट्र बैंकको व्यवस्था अनुसार वाणिज्य बैंकहरूले अघिल्लो महिनाको ब्याजदरको तुलनामा १० प्रतिशत ब्याजदर घटाउन/बढाउन पाउँछन् । सोही अनुसार बैंकहरूले ब्याजदर घटाएका हुन् ।
कात्तिकमा बैंकहरूले औसतमा व्यक्तिगत मुद्दती निक्षेपको ब्याजदर ०.३१९ प्रतिशत बिन्दुले घटाएका छन् । असोजमा व्यक्तिगत मुद्दतीको औसत ब्याजदर १०.२८३ प्रतिशत रहेकोमा कात्तिकमा घटेर ९.९६४ प्रतिशतमा झरेको छ । त्यस्तै, संस्थागत मुद्दतीको औसत ब्याजदर असोजमा ८.१८९ प्रतिशत रहेकोमा कात्तिकमा ७.८५ प्रतिशतमा झरेको छ ।
कात्तिकमा वाणिज्य बैंकहरू बीच निक्षेपको ब्याजदर १.७८ प्रतिशतसम्म फरक भएको छ । अधिकतम दिनले ११.००३ प्रतिशत र न्यूनतम दिने ९.२२ प्रतिशत ब्याजदर दिने भएका छन् ।
कुनको कति ?
कात्तिकमा सबैभन्दा धेरै निक्षेपको ब्याजदर एभरेष्ट बैंकले घटाएको छ । असोजको तुलनामा कात्तिकमा एभरेष्टले १.८३ प्रतिशत विन्दुले ब्याजदर घटाएको छ। असोज महिनामा ११.०५४ प्रतिशत रहेको बैंकको व्यक्तिगत मुद्दतीको ब्याजदर कात्तिकमा ९.२२४ प्रतिशतमा झारेको छ ।
त्यसैगरी, प्राइम कमर्सियल बैंक, नबिल बैंक र नेपाल इन्भेष्टमेन्ट मेगा बैंकले पनि १ प्रतिशतविन्दुभन्दा बढी ब्याजदर घटाएका छन्।
कात्तिकमा ३ बैंकले सबैभन्दा धेरै ११.००३ ब्याजदर दिने भएका छन् । एनएमबी, एनआइसी एशिया र हिमालयकाले व्यक्तिगत मुद्दतीमा ११.००३ प्रतिशत ब्याजदर दिने भएका हुन् ।
त्यस्तै, नेपाल एसबीआइ, इन्भेष्टमेन्ट मेगा, कुमारी, नबिल, ग्लोबल आइएमई र लक्ष्मी सनराइजले १० प्रतिशत ब्याजदर दिने भएका छन् ।
कात्तिकमा सबैभन्दा कम ब्याजदर विदेशी स्वामित्वको स्ट्याण्डर्ड चार्टर्डको रहेको छ । यसले व्यक्तिगत मुद्दतीमा ९.२२ प्रतिशत ब्याजदर दिने भएको छ । त्यस्तै, एभरेष्ट, प्रभु, सानिमा, प्राइम कर्मशियल र नेपाल बैंकले पनि ९.२२४ प्रतिशत ब्याज दिने भएका छन् ।
