काठमाडौं । यस वर्ष वाणिज्य बैंकका सबै शाखाबाट नयाँ नोट साट्न नपाइने भएको छ । विगतका वर्षहरूमा वाणिज्य बैंकका सबै शाखाहरूबाट नयाँ नोट सटही सुविधा पाइने भए पनि यस वर्ष सीमित शाखाबाट मात्र पाइने भएको छ ।
यस वर्ष राष्ट्र बैंकले नै वाणिज्य बैंकहरुलाई सीमित शाखाहरूबाट मात्रै नोट बाँड्ने व्यवस्था मिलाउन भनेसँगै बैंकहरूले पनि सोही बमोजिम व्यवस्था गरेका छन् । अधिकांश बैंकहरूले आफूले नयाँ नोट सटही गर्ने शाखाबारे जानकारी दिन सूचना निकालेका छन् ।
आजदेखि नयाँ नोट सटही सुरु भएको छ । तर, वाणिज्य बैंकका सबै शाखाहरूबाट नपाउँदा सर्वसाधरणले सास्ती व्यहोर्नु पर्ने भएको छ । राष्ट्र बैंक र वाणिज्य बैंकको तोकिएको शाखा कार्यालयहमा नयाँ नोट साटन् सर्वसाधरणको भीड लागेको छ ।
राष्ट्र बैंकका अनुसार प्रतिव्यक्ति ५, १०, २०, ५० र १०० दरका एक/एक बण्डल गरी कुल साढे १८ हजार रुपैयाँ बराबरको नोट सटही सुविधा दिइने छ ।
क्यूआर मार्फत भुक्तानी गरेर नयाँ नोट साट्न सक्ने व्यवस्था गरिने राष्ट्र बैंकले जनाएको छ । यस वर्ष राष्ट्र बैंकले करिब १० अर्बभन्दा बढी रुपैयाँको नयाँ नोट बजारमा पठाएको छ ।
कुन बैंकको कुन शाखाबाट साट्न पाइन्छ नयाँ नोट ?
ग्लोबल आइएमई बैंकले काठमाडौं उपत्यकाको ५ शाखाबाट नयाँ नोट सटही गर्ने भएको छ । बैंकका अनुसार काठमाडौंको कान्तिपथ, कमलादी, धापासी, ललितपुरको पुलचोक र भक्तपुरको सूर्यविनायक शाखाबाट मात्र नयाँ नोट साटिने छ ।
त्यस्तै, प्रभु बैंकले नयाँ बानेश्वर, स्वयम्भू, कुमारीपाटी (मानभवन), भैंसेपाटी र ठिमी शाखाबाट मात्र नयाँ नोट साट्ने भएको छ ।
नबिल बैंकले उपत्यकाका जम्मा ५ वटा शाखाबाट मात्र सटही सुविधा उपलब्ध गराउने भएको छ । बैंकका अनुसार लाजिम्पाट, गुसिंगल, मंगलबजार, कमल विनायक र बौद्ध रामहिटी शाखाबाट नयाँ नोट सटही सुविधा पाइने छ ।
माछापुच्छ्रेले काठमाडौंको लाजिम्पाट, भक्तपुरको कौशलटार र ललितपुरको पुल्चोकबाट नयाँ नोट सटही सुविधा उपलब्ध गराउने भएको छ ।
कुमारी बैंकले आजदेखि कात्तिक २ गते (१ देखि ३ बजे) र ३ गते (११ देखि १ बजेसम्म) नयाँ नोट सटही गर्ने भएको छ । बैंकले उपत्यकाका पुतलीसडक, गांगबु, पेप्सीकोला, बागबजार, टेकु, महाराजगञ्ज, चाबहिल, कुमारीपाटी, नयाँ बानेश्वर र सूर्यविनायक शाखाबाट नयाँ नोट साट्ने भएको छ ।
त्यसैगरी, सिटिजन्स बैंकले उपत्यकाका खरबारमार्ग, न्यूरोड, कलंकी, मैतीदेवी, थापाथली, कमलादी, नयाँ बानेश्वर, सामाखुसी, धुम्बाराही, बौद्ध, कीर्तिपुर, कुमारीपाटी, थसीखेल, ठिमी र सूर्यविनायक शाखाबाट सटही सुविधा उपलब्ध गराउने भएको छ ।
एनआइसी एशिया बैंकले उपत्यकाका ४ शाखाहरू थापाथली, धापासी, भैंसेपाटी र व्यासी विस्तारित काउन्टरबाट नयाँ नोट साट्ने भएको छ ।
