काठमाडौं । सेयर बजारमा लगातार तेस्रो दिन दोहोरो अंकको गिरावट आएको छ । अघिल्ला दुई दिनमै ४८ अंकले घटेको नेप्से आज १९ अंकले घटेको हो । यस साता ३ दिनमै नेप्से ६७ अंकले घटिसकेको छ ।
दुई वर्ष यता बियरिस ट्रेन्डमा रहेको नेप्से अझै लय समात्न सकेको छैन । यस अवधिमा सरकार र नेपाल राष्ट्र बैंकले केही नीतिगत लचकता अपनाए पनि लगानीकर्ता आशावादी हुन नसक्दा नेप्सेमा लगातार गिरावट जारी रहेको हो ।
गत शुक्रबार मात्र नेपाल राष्ट्र बैंकले सेयर धितो कर्जामा १२ करोडको सीमा बढाएर व्यक्तिगततर्फ १५ करोड र संस्थागतका लागि २० करोड बनाएको थियो । तर, जोखिम भार १५० प्रतिशत कायमै राख्दा लगानीकर्ता उत्साही बन्न नसकेका हुन् ।
मंगलबार नेप्से परिसूचक १९.०६ अंकले घटेर १८८९.५९ विन्दुमा आइपुगेको छ । यसदिन २८२ कम्पनीको १ अर्ब २८ करोड रुपैयाँ बढीको ४२ लाख ४७ हजार ४२६ कित्ता सेयर किनबेच भएको छ ।
कारोबारमा आएका १३ वटै समूहको परिसूचक घटेको छ । हाइड्रोपावर समूहको परिसूचक सबैभन्दा धेरै १.७९ प्रतिशतले घटेको छ ।
आज सानिमा जीआइसी इन्स्योरेन्सको सर्वाधिक कारोबार भएको छ । यसको २० करोड रुपैयाँको सेयर किनबेच भएको छ ।
घट्दो बजारमा आज बाराही हाइड्रोपावरका सेयरधनीले सर्वाधिक ७.६४ प्रतिशत गुमाएका छन् भने अपर लोहोरे खोला हाइड्रोपावरका सेयरधनीले ५.८६ प्रतिशत कमाएका छन् ।
