काठमाडौं । आजदेखि दसैँका लागि अग्रिम टिकट बुकिङ खुलेको छ । भौतिक पूर्वाधार तथा यातायात मन्त्रालय, यातायात व्यवस्था विभाग र यातायात व्यवसायीबीच गत शुक्रबार भएको छलफल अनुसार आजदेखि बसको अग्रिम टिकट बुकिङ खुलाइएको हो ।
टिकट बुकिङ खुला भएसँगै बिहानदेखि नै गोंगबुस्थित नयाँ बसपार्कमा टिकट लिनेहरुको भीड लागेको छ । त्यस्तै, कोटेश्वर, कलंकी, बल्खु लगायत काउन्टरहरुमा पनि टिकट लिनेको घुइँचो लागेको छ ।
यातायात व्यवसायीले भाडा बढाएर टिकट बुकिङ खुलाउन लबिङ गरे पनि पुरानै भाडादरमा टिकट बुकिङ खुलाइएको हो ।
अग्रिम टिकट बुकिङ खुला गरिएसँगै यात्रुको चाप हुने स्थानमा यात्रु सहायता कक्ष स्थापना गरिने यातायात व्यवस्था विभागले जनाएको छ । कालोबजारीमा टिकट बिक्री हुन नदिन अनुगमन गरिने विभागको भनाइ छ ।
