काठमाडौं । सेयर बजारमा दोहोरो अंकको गिरावट आएको छ । यस साता आइतबार ३३ अंकले घटेको नेप्से हिजो ५ अंकले फर्के पनि आज फेरि दोहोरो अंकले घटेको हो । मंगलबार नेप्से परिसूचक १७.५६ अंकले घटेर १९५८.७२ विन्दुमा आइपुगेको छ ।
आज सूचकसँगै कारोबार रकममा पनि भारी गिरावट आएको छ । अघिल्लो दिनको तुलनामा कारोबार रकम ५४ करोडले घटेर १ अर्ब १९ करोडमा सीमित भएको छ । यसदिन २८१ कम्पनीको ३९ लाख ६५ हजार ९१७ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचक राताम्मे भएको छ । व्यापार समूहको परिसूचक सबैभन्दा धेरै १.४७ प्रतिशतले घटेको छ ।
आज सिटिजन लाइफ इन्स्योरेन्सको सर्वाधिक कारोबार भएको छ । यसको साढे ५ करोड रुपैयाँ बढीको सेयर किनबेच भएको छ ।
दोहोरो अंकले घटेको बजारमा आज सामुदायिक लघुवित्तका सेयरधनीले सर्वाधिक ७.५४ प्रतिशत गुमाएका छन् भने समता लघुवित्तका सेयरधनीले ७.९१ प्रतिशत कमाएका छन् ।
