काठमाडौं । नेपाल विद्युत् प्राधिकरणले खरिद बिक्री सम्झौता (पीपीए)का लागि आह्वान गरेको छ । प्राधिकरणले नदी प्रवाही (आरओआर) र अर्धजलाशययुक्त (पीआरओआर) दुवै प्रकृतिका जलविद्युत् आयोजनाका लागि पीपीए खुलाएको हो ।
प्राधिकरणले मंगलबार एक सूचना जारी गर्दै नदी प्रवाहमा आधारित आयोजनाबाट ६ हजार ७५० मेगावाट र अर्धजलाशययुक्त आयोजनाको लागि ४ हजार ५०० मेगावाट नपुगेसम्म पीपीए गर्ने जनाएको छ ।
प्राधिकरणसँग ग्रिड कनेक्सन एग्रिमेन्ट सम्पन्न भएको मितिलाई आधार मानी रोल क्रम रहेका प्रबद्र्धकहरुलाई आवेदन दिन आह्वान गरेको हो ।
प्राधिकरणले यसअघि पीपीए प्रक्रियामा रहेका पबद्र्धक कम्पनी र विद्युत नियमन आयोगबाट पीपीएको मस्यौदामा सहमति प्राप्त भई पीपीएमा हस्ताक्षर गर्ने प्रयोजनार्थ अख्तियारी, परफरमेन्स बैंक जमानत र पीपीए शुल्क बुझाउन पत्राचार गरिएको प्रबद्र्धक कम्पनीलाई पीपीएका लागि आह्वान गरेको हो ।
इच्छुक प्रबद्र्धकहरुले आजको ३५ दिन भित्र आवश्यक कागजातसहित आवेदन दिनुपर्ने प्राधिकरणले जनाएको छ । प्रक्रिया नपुर्याइ आवेदन दिए रोल क्रममा रहेका अन्य आयोजनाको पीपीए प्रक्रिया अघि बढाइने प्राधिकरणले जनाएको छ ।
प्राधिकरणले ४ वर्षपछि गत माघमा आरओआरमा आधारित १५०० मेगावाट बराबरको आयोजनाको पीपीए खुलाएको थियो । ऊर्जा व्यवसायीले १० हजार मेगावाट बराबर आयोजनाको पीपीए खुलाउन माग गर्दै आएका छन् ।
