काठमाडौं । विश्व बैंकले चालु आर्थिक वर्षमा नेपालको आर्थिक वृद्धि ३.९ प्रतिशत हुने प्रक्षेपण गरेको छ । मंगलबार सार्वजनिक भएको विश्व बैंकको अर्धवार्षिक प्रतिवेदन नेपाल डेभलपमेन्ट अपडेटमा यस्तो प्रक्षेपण गरिएको हो ।
पछिल्लो समय आयात प्रतिबन्ध हट्नु, पर्यटन क्षेत्रमा सुधार आउनु, राष्ट्र बैंकले मौद्रिक नीति विस्तारै खुकुलो बनाउँदै लैजानु जस्ता कारणले चालु आवमा आर्थिक वृद्धिदरमा सुधार हुने विश्व बैंकले बताएको छ ।
विश्व बैंकले चालु आवमा नेपालको कृषि क्षेत्रको वृद्धि २.१ प्रतिशत, उद्योगको वृद्धिदर ३.२ प्रतिशत, सेवा क्षेत्रको वृद्धिदर ५.१ प्रतिशत हुने प्रक्षेपण गरेको छ ।
सरकारले चालु आवमा ६ प्रतिशत आर्थिक वृद्धिदर हासिल गर्ने लक्ष्य राखेको छ । गत आर्थिक वर्षमा नेपालको आर्थिक वृद्धि १.९ प्रतिशतमा सीमित भएको थियो । आगामी आर्थिक वर्ष २०८१/८२ मा भने नेपालको आर्थिक वृद्धि ५ प्रतिशत हुने विश्व बैंकको प्रक्षेपण छ ।
दक्षिण एसियाका कुन देशको आर्थिक वृद्धि कति ?
चालु वर्षमा दक्षिण एसिया क्षेत्रको आर्थिक वृद्धिदर औसतमा ५.८ प्रतिशत हुने प्रक्षेपण गरेको छ । दक्षिण एसियामा सबैभन्दा उच्च आर्थिक वृद्धि भारतको ६.३ प्रतिशत हुने विश्व बैंकको प्रक्षेपण छ ।
त्यस्तै, बंगलादेशको ५.६ प्रतिशत, माल्दिभ्सको ५.२ प्रतिशत, भुटानको ४ प्रतिशत, श्रीलंका र पाकिस्तानको १.७ प्रतिशत मात्रै आर्थिक वृद्धि हुने विश्व बैंकको प्रक्षेपण छ ।
