काठमाडौं । अर्थतन्त्रमा देखिएको शिथिलताको असर निर्जीवन बीमा कम्पनीको व्यवसायमा देखिएको छ । चालु आर्थिक वर्षको दुई महिना (साउन-भदौ)मा निर्जीवन बीमा कम्पनीको कुल बीमा शुल्क १० प्रतिशतले घटेको हो ।
बीमा प्राधिकरणले सार्वजनिक गरेको तथ्यांक अनुसार यो वर्षको भदौसम्म कम्पनीहरुले ७ अर्ब ८ करोड रुपैयाँ कुल बीमा शुल्क संकलन गरेका छन् ।
अघिल्लो वर्षको सोही अवधिको तुलनामा यो ७९ करोड रुपैयाँले कम हो । गत वर्षको दुई महिनामा कम्पनीहरुले ७ अर्ब ८८ करोड रुपैयाँ बीमा शुल्क आर्जन गरेका थिए ।
चालु वर्षमा ४ लाख ९ हजार कुल बीमालेख जारी गर्दा गत वर्ष कम्पनीहरुले ४ लाख ४५ हजार पोलिसी जारी गरेका थिए ।
गत वर्षदेखि आन्तरिक अर्थतन्त्र चलायमान नहुँदा व्यापार व्यवसाय बढ्न सकेको छैन । जसको कारण समग्र वित्तीय प्रणाली खल्बलिएको छ । उच्च ब्याजदर, आयस्रोतको घट्नु, महंगी बढ्नु जस्ता कारणले उपभोक्ताको खर्च गर्ने क्षमतामा ह्रास आएको छ । सोही कारण बीमा व्यवसायमा समेत धक्का लागेको देखिन्छ ।
१४ वटा निर्जीवन बीमा कम्पनी मध्ये सातवटाको व्यवसाय वृद्धि भएको छ भने सात वटाकै घटेको छ । प्राधिकरणका अनुसार सबैभन्दा धेरै राष्ट्रिय बीमा संस्थानको ५७ प्रतिशतले व्यवसायमा गिरावट आएको छ ।
दोस्रोमा नेपाल इन्स्योरेन्सको २५ प्रतिशतले व्यवसाय घटेको छ । सिद्धार्थ प्रिमियरको २२.९ प्रतिशत, युनाइटेड अजोडको ११.९४, नेकोले २.४६ र शिखर इन्स्योरेन्सको १ प्रतिशतले बीमा शुल्क संकलन घटेको छ ।
सबैभन्दा धेरै बीमा व्यवसाय बढाउनेमा प्रभु इन्स्योरेन्स पहिलो स्थानमा छ । यो कम्पनीले ३८ प्रतिशतले व्यवसाय वृद्धि गरेको छ । नेशनल १५, हिमालयन एभरेष्ट १४ र ओरिअन्टल इन्स्योरेन्स कम्पनीले ४ प्रतिशतले व्यवसाय बढाएको छ ।
यसअवधिमा सबैभन्दा धेरै बीमाशुल्क सगरमाथा लुम्बिनी इन्स्योरेन्सले ९१ करोड रुपैयाँ बराबरको व्यवसाय गरेको छ । सिद्धार्थ प्रिमियर ७३ करोड, शिखर ६६ करोड, हिमालयन एभरेष्ट ६४ करोड रुपैयाँले बीमा हुल्क आर्जन गरेका छन् ।
सबैभन्दा कम नेपाल इन्स्योरेन्सले २३ करोड रुपैयाँले बीमा शुल्क संकलन गरेको छ ।
