काठमाडौं । ऊर्जा सम्मेलनकै क्रममा तीन समझदारी भएका छन् । सम्मेलनको पहिलो दिन हिजो (बिहीबार) दुई वटा र दोस्रो दिन आज (शुक्रबार) एफएमओ र नेपाल बैंकर्स संघबीच समझदारी पत्र (एमओयु) भएको हो ।
ऊर्जा सम्मेलनको पहिलो दिन र दोस्रो दिन गरी कुल तीनबटा समझदारी पत्रमा हस्ताक्षर भएका हुन् । हिजो भारत सरकार स्वामित्वको एनएचपीसी लिमिटेड र नेपाल सरकार स्वामित्वको हाइड्रोइलेक्ट्रिसिटी एन्ड इन्भेस्टमेन्ट कम्पनी लिमिटेड (एचआईडीसीएल) को साझेदारी पत्रमा हस्ताक्षर भएको थियो । यसैगरी, हिजो नै इन्डियन इनर्जी लिमिटेड र स्वतन्त्र ऊर्जा उत्पादकहरुको संस्था (इपान)बीच समझदारी भएको थियो ।
जलविद्युतमा लगानी गर्नका लागि दुवै सरकारी स्वामित्वका एचआईडीसीएल र एनएचपीसीबीच एमओयुमा हस्ताक्षर भएको छ । एचएचपीसी भारतको केन्द्रीय सरकारको स्वामित्वको कम्पनी हो । उसले भारत र भुटानमा जलविद्युतमा लगानी गरिसकेको छ ।
एनएचपीसीले हिमाञ्चल प्रदेशमा १८० मेगावाटको बैरासिलु पावर स्टेशन, ५४० मेगावाटको चमेरा, ३०० मेगावाटको चमेरा दोस्रो र २३१ मेगावाटको चमेरा तेस्रो जलविद्युत आयोजना निर्माण तथा सञ्चालन गरिरहेको छ ।
