काठमाडौं । नेपाल राष्ट्र बैंकले सुन आयातको कोटा दोब्बरले बढाएको छ । राष्ट्र बैंक संचालक समितिको शुक्रबार बसेको बैठकले सुन आयातको कोटा बढाउने निर्णय गरेको हो ।
उद्योग वाणिज्य तथा आपूर्ति मन्त्रालयको सिफारिसमा राष्ट्र बैंकले सुन आयातको कोटा दोब्बर बनाएको हो । राष्ट्र बैंकले हाल वाणिज्य बैंकहरुलाई दैनिक १० केजी सुन आयातको अनुमति दिएकोमा अब दैनिक २० केजी ल्याउन पाउने भएका हुन् ।
यद्यपि, राष्ट्र बैंकले सुन आयोतको कोटा बढाइएको बारे परिपत्र भने गरेको छैन । राष्ट्र बैंकको सकुर्लरपछि मात्रै सो निर्णय कार्यान्वयनमा आउने छ । सुनको कोटा बढाइएको परिपत्र सम्भवत आजै जारी हुनसक्ने राष्ट्र बैंकका एक अधिकारीले बताए ।
वाणिज्य बैंकहरुले दैनिक २० किलो सुन आयात गर्दै आएकोमा राष्ट्र बैंकले २०७८ फागुन २२ गते एक परिपत्र गर्दै सुन आयातको दैनिक कोटा १० किलोमा झारेको थियो । राष्ट्र बैंकले सुन आयातमा कडाइ गर्दा बजारमा सुनको अभाव भएको र अवैध सुनको कारोबार बढेको भन्दै व्यवसायीले कोटा बढाउन माग गर्दै आएको थिए ।
