काठमाडौं । पशुपति क्षेत्र विकास कोषद्धारा वनकाली ओरालो क्षेत्रमा संचालित पार्किङको ठेक्का रद्द गरेको छ । बिहीबार संस्कृति पर्यटन तथा नागरिक उड्डयन मन्त्रलयमा बसेको विकास कोषको बैठकले पार्किङको ठेक्का रद्द गरेको हो ।
उक्त पार्किङको ठेक्का पाएको तत्व इन्भेष्टमेन्ट एण्ड सर्भिस प्रालिले सम्झौता पालान नगरेको भन्दै कोषले ठेक्का रद्द गरेको हो । सम्झौता अनुसार मासिक ४ लाख ८३ हजार ३३ क्षेत्र विकास कोषलाई भुक्तानी गर्नुपर्नेमा लामो समयसम्म बक्यौता बाँकी राख्नेको र अन्य थुप्रै नियम उलंग्घन गरेकाले ठेक्का रद्द गरिएको कोषले जनाएको छ ।
साथै, कोषले बाँकी बक्यौता एक महिनाभित्र उठाइसक्ने निर्णय गरेको छ । कोषको बैठकले ठेकेदार कम्पनी तत्व इन्भेष्टमेन्टको बैंक ग्यारेन्टी समेत जफत गर्ने निर्णय गरेको छ ।
ठेक्का सम्झौता अनुसार बढीमा ३ महिनासम्मको भाडा तिर्न बाँकी राखेमा कोषले ठेक्का सम्झौता रद्द गर्न सक्ने उल्लेख छ । कोषको आर्थिक प्रशासन शाखाका अनुसार कम्पनीले कोषलाई ३४ लाख ७४ हजार ११९ रुपैयाँ भाडा बुझाउन बाँकी छ ।
