काठमाडौं । सरकारले पेट्रोलियम पदार्थको मूल्य बढाएको छ । नेपाल आयल निगमले बिहीबार राति १२ बजेदेखि लागू हुने गरी पेट्रोल प्रतिलिटर ४ रुपैयाँ, डिजेल र मट्टितेल प्रतिलिटर ३ रुपैयाँ भाउ बढाएको हो ।
निगमका अनुसार अब पेट्रोलको उपभोक्ता मूल्य पहिलो वर्गमा १७९.५० रुपैयाँ ५० पैसा, दोस्रो वर्गमा १८१ र तेस्रो वर्गमा १८२ रुपैयाँ कायम भएको छ ।
त्यस्तै, डिजेल र मट्टीतेल पहिलोमा १६७.५० रुपैयाँ, दोस्रोमा १६९ र तेस्रोमा १७० रुपैयाँ पुगेको छ ।
त्यसैगरी, निगमले खाना पकाउने एलपी ग्यास प्रतिसिलिन्डर २३५ रुपैयाँले बढाएको छ । बढेको मूल्य अनुसार अब एलपी ग्यास प्रतिसिलिन्डरको १ हजार ८९५ रुपैयाँ पुगेको छ । यसअघि १ हजार ६६० रुपैयाँ थियो।
इण्डियन आयल कर्पोरेशनबाट मूल्य वृद्धि भएर आएकाले नेपालमा पनि पेट्रोलियम पदार्थमा मूल्य वृद्धि गरिएको निगमले विज्ञप्तिमा जनाएको छ ।
निगमका अनुसार इण्डियन आयल कर्पोरेशनबाट पेट्रोल र डिजेलमा क्रमशः प्रतिलिटर ३.१७ रुपैयाँ र २.४८ तथा एलपी ग्यासको मूल्यमा प्रति सिलिण्डर १८६.४५ रुपैयाँले वृद्धि भएर आएको छ ।
