काठमाडौं । अर्थतन्त्रमा रहेको शिथिलताका बाबजूद जीवन बीमा कम्पनीकोहरूको व्यवसायमा उल्लेख्य सुधार आएकोछ । चालु आर्थिक वर्ष २०८०/८१ को पहिलो महिना (साउन)मा जीवन बीमा कम्पनीहरूको बीमा शुल्क संकलन गत वर्षको तुलनामा ३०.२१ प्रतिशतले बढाउन सफल भएका हुन् ।
नेपाल बीमा प्राधिकरणले सार्वजनिक गरेको तथ्यांक अनुसार १४ वटा जीवन बीमा कम्पनीले साउनमा १९ अर्ब ६० करोड ६३ लाख रुपैयाँ कुल बीमा शुल्क संकलन गरेका छन् । यो गत वर्षको सोही अवधिको तुलनामा ४ अर्ब ५४ करोड रुपैयाँ बढी हो । जीवन बीमा कम्पनीहरूले गत वर्ष कुल १५ अर्ब ५ करोड रुपैयाँ बीमा शुल्क संकलन गरेका थिए ।
डेढ वर्षदेखि अर्थतन्त्रमा देखिएको संकटका कारण गत वर्ष बीमा कम्पनीको व्यवसाय र खुद नाफामा दबाब परेको थियो । अर्थतन्त्र र वित्तीय प्रणालीमा देखिएको समस्याका कारण कम्पनीहरूले व्यवसाय बढाउन सकेका थिएनन् । सोही कारण पछिल्ला वर्षहरूमा पोलिसी सरेन्डर गर्नेक्रम पनि तीव्र हुँदै गएको छ ।
नयाँ आर्थिक वर्षको पहिलो महिना भएकाले नवीकरण गर्नेहरूको संख्या बढेको बीमा क्षेत्रका जानकारहरू बताउँछन् । साउनमा कम्पनीहरूले २ अर्ब २९ अर्ब प्रथम बीमा शुल्क आर्जन गरेको छ ।
यो महिना कम्पनीले १७ अर्ब रुपैयाँ नवीकरण बीमा शुल्क आर्जन गरेका छन् । पूँजी वृद्धिको दबाबमा परेका कमपनीहरू अहिले अर्थतन्त्र संकटको पनि सामना गरिरहेका छन् । जसको कारण व्यवसाय उल्लेख्य रुपमा बढ्न सकेको छैन ।
नेपाल लाइफको वर्चश्व कायमै
जीवन बीमा क्षेत्रमा व्यवसायिक सफलता हासिल गरिरहेको नेपाल लाइफ इन्स्योरेन्स कम्पनीले सबैभन्दा धेरै प्रिमियम संकलन गरेको छ । साउनमा यस कम्पनीले बीमा शुल्क ९.४ प्रतिशतले वृद्धि गरेर ५ अर्ब २२ कराड रुपैयाँ संकलन गरेको छ ।
जुन कुल बीमा व्यवसायको करिब एकतिहाई हिस्सा हो । दोस्रोमा राष्ट्रिय बीमा संस्थानले ३ अर्ब ३४ करोड रुपैयाँ बीमा शुल्क आर्जन गरेको छ । यस कम्पनीले ५६५ प्रतिशतले बीमा शुल्क संकलन बढाएको हो ।
सन्नेपाल लाइफ इन्स्योरेन्स कम्पनीको ९.६२ प्रतिशतले व्यवसाय घटेको छ । गत वर्ष ३९ करोड रुपैयाँ कुल बीमा शुल्क आर्जन गरेको कम्पनीले यो वर्ष ३५ करोड रुपैयाँ संकलन गरेको छ ।
कुनले कति गरे प्रिमियम संकलन ?
साउनमा नेपाल लाइफले सबैभन्दा धेरै ५ अर्ब २२ करोड बीमा शुल्क संकलन गरेको छ भने सन नेपाल लाइफले सबैभन्दा कम ३५ करोड ६३ लाख रुपैयाँ संकलन गरेको छ ।
यस्तै, दोस्रो धेरै बीमा शुल्क संकलन गर्नेमा सरकारी स्वामित्वको राष्ट्रिय बीमा संस्थान रहेको छ । गत वर्षको तुलनामा झन्डै ६ गुणाले व्यवसाय बढाएको यस कम्पनीले साउनमा ३ अर्ब ३४ करोड रुपैयाँ बीमा शुल्क संकलन गरेको छ ।
तीन कम्पनी मर्जर गरेर बनेको हिमालयन लाइफल १ अर्ब ९३ करोड रुपैयाँ बीमा शुल्क आर्जन गरेको छ । यसैगरी, लाइफ इन्स्योरेन्स कर्पोरेसन १ अर्ब ९२ करोड, नेशनल लाइफ १ अर्ब ८० करोड र सूर्यज्योति लाइफले १ अर्ब रुपैयाँ बीमा शुल्क संकलन गरेका छन् ।
यसैगरी, एशियन लाइफ ८२ करोड, सानिमा रिलायन्स ६६ करोड, सिटिजन लाइफ ५७ करोड, प्रभु महालक्ष्मी ५४, आइएमई ५२, मेटलाइफ ४९ र रिलायबल नेपालले ३८ करोड रुपैयाँ बीमा शुल्क संकलन गरेका छन् ।
