काठमाडौं । सेयर बजारमा दोहोरो अंकको वृद्धि भएको छ । मौद्रिक नीतिपछि लगातार २०७ अंकले घटेर गत बुधबारदेखि उकालो लागेको नेप्सेले आज पनि सोही लय कायम राखेको छ ।
आइतबार नेप्से परिसूचक १४.८१ अंकले बढेर २०८०.८६ विन्दुमा पुगेको छ । यसदिन २७१ कम्पनीको सेयर कारोबार भएको छ ।
सूचकसँगै आज कारोबार रकममा पनि ठूलो बढोत्तरी भएको छ । आज ३ अर्ब १ करोड रुपैयाँ बढीको ९७ लाख १८ हजार ७५४ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ९ उपसमूहको परिसूचक बढेको छ भने ४ को घटेको छ । निर्जीवन बीमा समूहको परिसूचक सबैभन्दा धेरै २.२१ प्रतिशतले बढेको छ ।
आज नेपाल इन्स्योरेन्सको प्रमोटर सर्वाधिक कारोबार भएको छ । यसको साढे ५८ करोड रुपैयाँको सेयर किनबेच भएको छ ।
दोहोरो अंकले बढेको बजारमा आज ३ कम्पनीको सेयर मूल्यमा पोजेटिभ सर्किट लागेको छ । थ्रीस्टार हाइड्रोपावर, अप्पर स्याङ्गे हाइड्रोपावर र माउन्टेन इनर्जीको सेयर मूल्य करिब १० प्रतिशतले बढेको छ ।
आजैबाट कारोबारमा आएको घोराही सिमेन्टको सेयर मूल्यमा भने नेगेटिभ सर्किट लागेको छ । यसका सेयरधनीले १० प्रतिशत गुमाएका छन् ।
