काठमाडौं । पूर्व–पश्चिम राजमार्ग अन्तर्गत बुटवल–गोरुसिङ्गे सडकखण्ड विस्तार गर्न ठेक्का लगाउने तयारी गरिएको छ । हाल दुई लेनमा रहेको यस सडकलाई स्तरोन्नति गरी ४ लेनको बनाउन लागिएको हो ।
सडक विभागका प्रवक्ता रामहरी पोखरेलले ठेक्का आह्वानका लागि अन्तिम तयारी भइरहेको बताए । ५० किलोमिटर सडक बुटवल–गोरुसिङ्गे विस्तारका लागि आगामी १० दिनमा ठेक्का आह्वान गरिने उनले बताए ।
‘अहिले ठेक्का आह्वानको अन्तिम चयारीमा छौँ, ८/१० दिनमा ठेक्को सूचना निकाल्ने छौँ,’ पोखरेलले चाणक्य पोष्टसँग भने । बुटवलब– गोरुसिङ्गे सडक विस्तारको डिजाइन भने तयार भइसकेको छ । एसियाली विकास बैंकको सहयोगमा बनेको उक्त डिजाइन स्विकृत समेत भइसकेको प्रवक्ता पोखरेलले बताए ।
झण्डै ६० वर्ष पुरानो बुटवलबाट गोरुसिङ्गेसम्म ५० किलोमिटर सडक हाल आएर विस्तार हुन लागेको हो । यो सडक तीन वर्षभित्र काम सम्पन्न हुने गरी गरी ठेक्का लगाउने तयारी भइरहेको हो ।
गोरुसिङ्गे–चन्द्रौटा खण्डको डिजाइन बन्न बाँकी
गोरुसिङ्गेदेखि चन्द्रौटासम्म १९ किलोमिटर सडक पनि विस्तार गर्न लागिएको छ । सो खण्डको भने डिजाइन तयार हुन बाँकी रहेको छ । सो सडक खण्डमा समेत चाँडै डिजाइन तयार गरी ठेक्का प्रकृया सुरु गरिने प्रवक्ता पोखरेलले बताए ।
यी सडक विस्तारसँगै पूर्व–पश्चिम राजमार्गमा हुने सवारीको चाप सहज ढंगले सञ्चालन हुने अनुमान गरिएको छ । बढ्दो सवारी चापसँगै राजमार्गका सडक विस्तार कार्य समेत बढ्दै गएको हो ।
पूर्व–पश्चिम राजमार्गअन्तर्गत बुटवल–नारायणगढ सडक खण्ड विस्तारको काम भइरहेको छ । विगत तीन वर्षदेखि चाइना स्टेट कम्पनीले उक्त खण्डमा सडक विस्तारको काम गरिरहेको छ ।
