काठमाडौं । बाढीपहिरोले देशभरका मुख्य सडक राजमार्ग अबरुद्ध भएका छन् । गत रातिदेखि परेको अविरल वर्षा र त्यसपछि आएको बाढीले दर्जनौं सडक अबरुद्ध भएका हुन् ।
नेपाल प्रहरीले अपडेट गरेको तथ्यांक अनुसार नारायणगढ–मुग्लिन, बिपी राजमार्ग, मदनभन्डारी, राजमार्ग, कान्तिराजपथ लगायत मुख्य सडक अवरुद्ध भएका छन् ।
प्रहरीका अनुसार संघीय राजधानी काठमाडौंको लाइफलाइन मानिने नारायणगढ–मुग्लिन सडक खण्डको कालिखोलामा गएको पहिरोका कारण यो सडक एकतर्फी मात्र सञ्चालनमा आएको छ ।
यसैगरी, मकवानपुरको बकैयास्थित लामराङमा पहिरोले खस्दा कान्ती लोकपथ अवरुद्ध भएको छ । बागलुङ नगरपालिका १० गलुवामा पहिरोले अाउँदा कालिगण्डकी करिडोर अवरुद्ध भएको छ ।
यस्तै, नुवाकोटको कककी निगालेमा गएको पहिरो जाँदा पासाङल्हामु राजमार्ग, पाँचथरको फिदिम ४ मा पहिरो जाँदा तमोर करिडोर, काभ्रेको रोशी गाउँपालिका कालढुंगा र सिन्धुलीको कमेरेफाँटमा पहिरो जाँदा बिपी राजमार्ग अबरुद्ध भएको प्रहरीले जनाएको छ ।
म्याग्दीको बेनी–जोमसोम सडक खण्ड समेत अवरुद्ध भएको छ । यस जिल्लाको रघुगंगास्थित बैसरीमा सडक अवरुद्ध भएको प्रहरीको भनाइ छ । डडेलधुराको बतुडर–जोगबुढा भित्रि सडक खण्ड समेत आज अवरुद्ध भएको छ ।
कैलालीको गोदावरी नगरपालिका ४ बुढीतोला र चुरे गाउँपालिकाको गोपालेमा गएको पहिरोले सडक अबरुद्ध भएको छ ।
