घोराही । दाङमा आर्थिक वर्ष २०७९/८० मा २९८ घरेलु तथा साना उद्योग बन्द भएका छन् ।
घरेलु तथा साना उद्योग कार्यालयका प्रमुख लालबहादुर गुरुङका अनुसार वाणिज्यतर्फ तीन सय २३ साना उद्योग बन्द भएका छन् । बन्द हुनेमा उत्पादनमूलक उद्योग ५४, पर्यटन उद्योग ४८ र सेवामूलक उद्योग ५६ रहेका छन् । कार्यालयमा आएर आधिकारिकरूपमा बन्द गराउनेको सङ्ख्या न्यून भएको उनले बताए ।
जिल्लामा आव २०७९÷८० मा सात सय ४२ घरेलु तथा साना उद्योग दर्ता भएका थिए । चालु तथा स्थिर पूँजीतर्फ रु १ अर्ब ४१ करोड एक लाख लगानी भएको छ । यसबाट रु ६३ लाख ३१ हजार राजश्व सङ्कलन भएको प्रमुख गुरुङले बताए । जिल्लामा हालसम्म ११ हजार ३८२ घरेलु तथा साना उद्योग रहेका छन् ।
विसं २०७९ असार मसान्तसम्म १० हजार ९३८ र आव २०७९÷८० मा ७४२ उद्योग थपिएको तथ्याङ्कले देखाएको छ । एक वर्षको अवधिमा ७१७ उद्योग नवीकरण भएका छन् । ८१२ उद्यमी थपिएका छन् । २ हजार ५५३ जनाले रोजगार प्राप्त गरेको तथ्याङ्क छ । उत्पादनमूलक उद्योग ७५ वटा दर्ता भएका छन् । यसमध्ये ६९२ जनाले रोजगार प्राप्त गरेका छन् । १८९ उद्योग नवीकरण गरिएको उनले बताए ।
कृषि तथा वनजन्य उद्योगमा ४३२ दर्ता भएका छन् । यसबाट १ हजार १६८ जनाले रोजगार प्राप्त गरेका छन् । कृषि तथा वनजन्य दुई सय १८ उद्योग नवीकरण भएका छन् । पर्यटन उद्योगतर्फ ८१ वटा थपिएका छन् भने ७० वटा नवीकरण भएका छन् । त्यस्ता उद्योगबाट चार सय ६५ जनाले रोजगार प्राप्त गरेका छन् । सेवामूलक २४० उद्योग नवीकरण भएका छन् । वाणिज्यतर्फ ८२७ फर्म दर्ता भएका छन् ।
कोभिड–१९ को प्रभावपछि वृद्धि गरिएको बैंक ब्याज, आर्थिक तरलतालगायत कारण बढीजसो उद्योग तथा वाणिज्य फर्म बन्द भएका हुन् । उद्योग तथा वाणिज्य फर्म बन्द भएपछि अहिले बजारमा व्यावसायिक सटर खाली रहेका छन् । उद्योगी तथा व्यवसायी विस्थापित भएका छन् । रासस
