काठमाडौँ । बैंक तथा वित्तीय संस्थाहरूले सडकले नछोएको जग्गा धितोमा पनि २० लाख रुपैयाँसम्म कर्जा प्रदान गर्नुपर्ने भएको छ । नेपाल राष्ट्र बैंकले व्यावसायिक कृषिलाई प्रोत्साहन गर्न यस्तो व्यवस्था गरेको हो ।
राष्ट्र बैंकका अनुसार खाद्य उत्पादन, पशु पालन तथा माछा पालन व्यवसाय गर्न सडक बाटोले नछोएको जग्गालाई समेत धितोमा स्वीकारी बैंकहरूले २० लाख रुपैयाँसम्म कृषि कर्जा प्रदान गर्नुपर्ने छ ।
बैंक तथा वित्तीय संस्थाले प्रदान गर्ने कृषि कर्जामा वास्तविक किसानहरूको पहुँच सुनिश्चित गर्न यस्तो व्यवस्थालाई निरन्तरता दिइएको राष्ट्र बैंकले जनाएको छ ।
राष्ट्र बैंकका अनुसार बैंकहरूले कृषि कर्जा मागको फाइल ७ कार्य दिन भित्र स्वीकृत गर्नुपर्ने र कर्जा दिन नसकिने भए स्पष्ट कारण खुलाई जानकारी दिनुपर्ने छ ।
कर्जा नदिएको वा कुनै समस्या भए सेवाग्राहीले सिधै केन्द्रीय बैंकमा रिपोर्ट गर्न समेत राष्ट्र बैंक सबैमा सुसूचित गरेको छ ।
वास्तविक किसानहरू कृषि कर्जाबाट वञ्चित हुन परेको भन्दै विरोध भएपछि केन्द्रीय बैंकले नयाँ व्यवस्था गरेको हो ।
