काठमाडौं । गत आर्थिक वर्ष २०७९/८० मा ८ भन्सार कार्यालयबाट निर्यात शून्य भएको छ । नेपालले वैदेशिक व्यापार गर्दै आएका २७ भन्सार नाकामध्ये ८ वटाबाट कुनै पनि वस्तु निर्यात नभएको हो ।
सरकारी बेवास्ता, आवश्यक पूर्वाधारको अभाव र छिमेकी देशको असहयोगका कारण यी भन्सारबाट निर्यात हुन नसकेको हो । २७ वटै भन्सारबाट वस्तु आयात हुने भए पनि निर्यातका लागि आवश्यक व्यवस्था मिलाइएको छैन ।
भन्सार विभागका अनुसार गत वर्ष भद्रपुर, जनकपुर, महेशपुर, राजविराज, सिराहा, सुनसरी, टाँडी र त्रिवेणी भन्सारबाट कुनै वस्तु निर्यात भएको छैन । जबकी गत वर्ष यी भन्सार कार्यालयबाट ७ अर्ब ७६ करोड रुपैयाँ बराबरको वस्तु आयात भएको छ ।
नेपालले भद्रपुर, भैरहवा, विराटनगर, वीरगञ्ज, ड्राइपोर्ट, गौर, जलेश्वर, जनकपुर, कैलाली, कञ्चनपुर, कृष्णनगर, महेशपुर, मेची, नेपालगन्ज, राजविराज, रसुवा, सर्लाही, सती, सिराहा, सुनसरी, सुथौली, तातोपानी, त्रिवेणी, टाँडी, त्रिभुवन अन्तर्राष्ट्रिय विमानस्थल र गौतमबुद्ध विमानस्थल भन्सार नाकाबाट अन्तर्राष्ट्रिय व्यापार गर्दै आएको छ ।
विराटनगर नाकाबाट मात्रै एकचौथाई निर्यात
गत वर्ष २७ मध्ये १९ भन्सार नाकाबाट वस्तु निर्यात भएको छ । जसमा ४ भन्सार कार्यालयबाट मात्रै कुल निर्यातको ८५ प्रतिशत अर्थात् १ खर्ब ३३ अर्ब रूपैयाँ बढीको वस्तु निर्यात भएको छ ।
विराटनगर भन्सार नाकाबाट सबैभन्दा धेरै अर्थात् एकचौथाई बढी वस्तु निर्यात भएको छ । गत वर्ष कुल १ खर्ब ५७ अर्बको वस्तु निर्यात भएकोमा विराट नगर भन्सारबाट मात्रै ३९ अर्ब ३३ करोडको वस्तु विदेशिएको छ । यो कुल निर्यातको २५.०३ प्रतिशत हो ।
त्यसैगरी, देशकै सबैभन्दा ठूलो वीरगञ्ज भन्सारबाट ३६ अर्ब ६७ करोडको वस्तु निर्यात भएको छ । तेस्रो धेरै वस्तु निर्यात हुनेमा त्रिभुवन विमानस्थलबाट ३५ अर्ब ५४ करोड अर्थात् २२.७५ प्रतिशत निर्यात भएको छ ।
यस्तै, मेची भन्सारबाट २२ अर्ब, भैरहवाबाट १० अर्ब ५३ करोड, ड्राइपोर्टबाट ५ अर्ब, नेपालगञ्जबाट २ अर्ब ४७ करोड, जलेश्वरबाट १ अर्ब ६१ करोड, कृष्णानगरबाट १ अर्ब ५८ करोड र रसुवा भन्सारबाट १ अर्ब १९ करोडको वस्तु निर्यात भएको छ ।
९ वटा भन्सार कार्यालयबाट भने १ अर्ब कमको वस्तु निर्यात भएको छ । जसमा सती भन्सारबाट सबैभन्दा कम १ लाख ८६ हजारको वस्तु विदेशिएको छ ।
वीरगञ्जबाट मात्रै ३७ प्रतिशत आयात
गत वर्ष वीरगञ्ज भन्सार नाकाबाट सबैभन्दा धेरै अर्थात् एकतिहाई बढी वस्तु आयात भएको छ । कुल १६ खर्ब ११ अर्ब बढीको वस्तु आयात भएकोमा वीरगञ्जबाट मात्रै ५ खर्ब ९३ अर्बको वस्तु आयात भएको छ । यो कुल आयातको ३६.८२ प्रतिशत हो ।
यस्तै, भैरहवा भन्सारबाट २ खर्ब ४४ अर्ब, ड्राइपोर्टबाट २ खर्ब २ अर्ब, विराटनगरबाट १ खर्ब ८६ अर्ब, त्रिभुवन अन्तर्राष्ट्रिय विमानस्थलबाट १ खर्ब ५४ अर्बको वस्तु आयात भएको छ ।
त्रिवेणी भन्सारबाट सबैभन्दा कम २७ लाख ४१ हजार रुपैयाँको वस्तु आयात भएको विभागको तथ्यांक छ ।
