काठमाठौं । राजस्व अनुसन्धान विभागले बुधबार साँझ त्रिभुवन अन्तर्राष्ट्रिय विमानस्थल क्षेत्रबाट ठूलो परिमाणमा सुन बरामद गरेको छ ।
विशेष सूचनाका आधारमा विमानस्थल भन्सार पास भएर आएको ठूलो परिमाणको सुन बरामद भएको विभागले जानकारी दिएको छ ।उक्त सुन विमानस्थल भन्सार गेट अगाडिबाट ट्याक्सीमा हालेर लैजान लागेका बेला बरामद भएको हो ।
बरामद भएको सुनको परिमाण नखुले पनि करिब ८० देखि १०० किलो रहेको बताइएकाे छ । यो अहिलेको बजार मूल्यका आधारमा १ अर्ब बढी मूल्यको हुन्छ ।नेपालमा एकैपटक यति ठूलो परिणाममा सुन बरामद भएको यो पहिलो पटक हो ।
राजस्व स्रोतका अनुसार उक्त सुन हङकङबाट क्याथे फ्यासिफिकको उडानमार्फत काठमाडौं ल्याइएको बताइएको छ । उक्त सुन मोटरका पार्टस (ब्रेक शु)भित्र राखेर ल्याइएको थियो ।
हिजाे राजस्व टोलीले उक्त सुन ओसारपसारमा संलग्न रहेका तीन जनालाई पक्राउ गरेको थियाे अाज थप २ जना पक्राउ परेका छन् । अहिले सो सुनको बारेमा अनुसन्धान जारी रहेकाले थप विवरण आउन बाँकी छ ।
