काठमाडौं । आर्थिक वर्ष २०७९/८० को ११ महिना(साउन—जेठ)सम्म वाणिज्य बैंकहरूले ६७ अर्ब बढी खुद नाफा कमाएका छन् । नेपाल राष्ट्र बैंकको तथ्यांक अनुसार जेठसम्म २० वटा वाणिज्य बैंकहरूले कुल ६७ अर्ब २३ करोड रुपैयाँ खुद नाफा आर्जन गरेका हुन ।
पछिल्लो एक महिनामा मात्रै वाणिज्य बैंकहरूले १० अर्ब रुपैयाँ नाफा कमाएका छन् । वैशाखसम्म वाणिज्य बैंकहरूले कुल ५७ अर्ब १७ करोड नाफा कमाएका थिए ।
अर्थतन्त्रमा देखिएको सिथिलता र कर्जा लगानीको सुस्तताका बाबजुत बैंकहरूको खुदनाफामा भने त्यत्ति धेरै असर देखिँदैन । यद्यपि, खराब कर्जा एक वर्षमा दोब्बरले बढेको छ भने ऋण अशुलीमा समस्या आएको बैंकरहरू बताउँछन् ।
आर्थिक वर्षको सुरुमा प्रणालीमा भएको तरलता संकट र त्यसपछि कर्जाको माग नहुँदा बैंकहरूले यस वर्ष लगानी गर्न सकेका छैनन् । यसका बाबजुत खुद नाफामा भने बैंकहरू बीच प्रतिस्पर्धा देखिएको छ ।
गत चैतकै तथ्यांक अनुसार आधा दर्जन बैंकको वितरणयोग्य नाफामा व्यापक गिरावट आएको थियो भने यो आव सकिने बेलासम्म एक दर्जन बढी बैंकहरूको वितरणयोग्य नाफा घट्ने बैंकरहरूको आकलन छ ।
नबिल एक्लैले कमायो ७ अर्ब
वाणिज्य बैंकहरू मध्ये वित्तीय सूचकमा अब्बल देखिएको नबिल बैंक एक्लैले जेठसम्म ७ अर्ब ११ करोड रुपैयाँ खुद नाफा आर्जन गरेको छ । पूँजी कोष र चुक्ता पूँजीको आधारमा ग्लोबल आइएमई, इन्भेष्टमेन्ट मेगा बैंक अघि भए पनि व्यवसायिक प्रतिस्पर्धामा भने नबिल नै अघि देखिएको छ ।
दुई वर्षअघि नेपाल बंगलादेश बैंक गाभेर बलियो सिनर्जी प्राप्त गरेको नबिल अन्य सूचकहरूमा पनि बलियो देखिएको छ । चुक्ता पूँजीको आधारमा सबैभन्दा ठूलो भए पनि ग्लोबल आइएमई बैंकले ६ अर्ब ५० करोड रुपैयाँ खुद नाफा कमाएर दोस्रो स्थानमा छ । नेपाल इन्भेष्टमेन्ट मेगाा, एनआइसी र सरकारी स्वामित्वको राष्ट्रिय वाणिज्य बैंक बीच टक्कर देखिएको छ ।
तेस्रोमा इन्भेष्टमेन्ट मेगाले ४ अर्ब ७६ करोड, एनआईसी ४ अर्ब ६३ र राष्ट्रिय वाणिज्य बैंकले ४ अर्ब ४४ करोड रुपैयाँ कमाएका छन् । पूँजी कोष र चुक्ता पूँजीको आधारमा कमजोर भए पनि यस वर्षको ११ महिनाको खुद नाफा आर्जनमा एनआइसीले आफूलाई अब्बल साबित गरेको छ ।
कुनले कति कमाए ?
यस अवधिमा सबैभन्दा धेरै नबिलले नाफा कमाउँदा खुद नाफा आर्जनमा कमजोर कृषि विकास बैंक देखिएको छ । कृषि विकासले १ अर्ब ५६ करोड रुपैयाँ नाफा कमाएको छ । यसैगरी, सिटीजन्स र माछापुच्छ्रेले डेढ/डेढ अर्ब रुपैयाँ बढी कमाएका छन् ।
एनएमबी बैंकले ३ अर्ब ३२ करोड, हिमालयन ३ अर्ब २९ करोड, लक्ष्मी सनराइज ३ अर्ब २८ करोड, प्राइम ३ अर्ब २१ करोड, स्ट्यान्डार्ड चार्टर्ड ३ अर्ब ११ करोड रुपैयाँ नाफा आर्जन गरेका छन् ।
नेपाल र एभरेष्ट बैंकलेले ३/३ अर्ब बढी कमाएका छन् । यसैगरी, कुमारी, प्रभु, सानिमा, सिद्धार्थ र एसबीआई बैंकले २/२ अर्ब रुपैयाँ बढी नाफा कमाएका छन् ।
