काठमाडौं । नेपाल समुद्रपार निकासी पैठारी संघले मूल्य अभिवृद्धिकर, आयकर र अन्तःशुल्क क्षेत्रका समस्या बारेमा ध्यानाकर्षण गराएको छ ।
संघका उपाध्यक्ष सुनिलकुमार बंशल नेतृत्वको प्रतिनिधिमण्डलले बिहीबार आन्तरिक राजस्व विभागका महानिर्देशक विनोदबहादुर कुँवरलाई भेटी बहुदर सम्बन्धी समस्या अवगत गराउँदै तिनको समाधानका लागि आग्रह गरेको हो ।
भेटमा प्रतिनिधिमण्डलका सदस्यले मूल्य अभिवृद्धिकरमा बहुदर कायम गर्न र अन्तर्राष्ट्रिय विमानस्थल हुँदै भित्रिने यात्रुलाई तोकिएभन्दा बढी परिमाणमा मदिरा ल्याउन नदिन पनि आग्रह गरे ।
कारोबार बन्द गर्न खोज्दा करका कारणले विभिन्न झमेला हुने र तयारी वस्तुमा भन्दा कच्चा पदार्थमा बढी अन्तःशुल्क लाग्ने गरेकोतर्फ पनि सहभागीले महानिर्देशकको ध्यानाकर्षण गराएका थिए । महानिर्देशक कुँवरले संघले उठाएका खास मुद्दाहरुलाई सम्बोधन गर्नेतर्फ पहल गर्ने बताए
